भांगरभूंय | प्रतिनिधी
भांगरभूंय । प्रतिनिधी
बेळगांवः कर्नाटकांत परत सत्तेर आयिल्ल्या काँग्रेस पक्षान बेळगांव जिल्ह्यांत भाजपाक फाटीं उडोवन आपलें निर्विवाद वर्चस्व परत एक फावट सिद्ध केलें. जिल्ह्यांतल्या 18 मतदारसंघांतल्या 11 मतदारसंघात काँग्रेस पक्षाच्या उमेदवारांनी जैत मेळयले. फाटले वेंचणुकेंत भाजपाचे 13 आनी काँग्रेसाच्या 5 उमेदवारांक जैत मेळल्लें.
भाजपा सरकाराच्या भ्रश्टाचाराक बेजारून पोरूं बेळगांव जिल्ह्यांतल्या एका कंत्राटदारान आत्महत्या केल्ली. भ्रश्टाचार आनी हेर कारणांक लागून हे खेपे बेंळगांव जिल्ह्यांतल्या मतदारांनी भाजपाक कुशीक वडोवन काँग्रेसाक लागीं केलें. बेळगांव जिल्ह्यांत गोंयचे मुख्यमंत्री डॉ प्रमोद सावंत, भलायकी मंत्री विश्वजीत राणे आनी कांय आमदरांनी भाजपा उमेदवारांचो प्रचार केल्लो. मात तांकां येश मेळ्ळें ना.
फाटले वेंचणुकेंत काँग्रेस पक्षाचे तिकेटीचेर वेंचून येवंन उपरांत भाजपांत प्रवेश केल्लो आनी मंत्री आसतना लिंगींक प्रकरणांत घुस्पल्ल्या रमेश जारकिहोळी बेळगांव ग्रामीण मतदारसंघांत हार खावची पडली. अथनी, रामदुर्ग, यामकारमर्डी आनी बायहोंगल मतदारसंघांत लोकांनी भाजपा फुडाऱ्यांक हारयलें. आदलो मंत्री लक्ष्मण सावडी आनी ब्रह्मगौडा कागे हांका भाजपान हे खेपे तिकेट दिवंक ना. मात काँग्रेस पक्षाचे तिकेटींचेर तांणी व्हडले जैत मेळयलें. नागेश मन्नोलकारान रमेश जारकिहोळीक हारयलें. महेश कुमटाळ्ळी (अथनी), जगदीश मेटागौड (बायलहोंगळ), बसवराज हुंडरी (यामाककमार्टी), चिका रेवण्णा (रामदुर्ग) हांका हार खावची पडली.
महाराष्ट्र एकीकरण समितीन पांच उमेदवारांक उबे केल्ले. मात तांका हार खावची पडली. दक्षीण बेळगांवात रमाकांत खोंडुस्कारान विद्यमान आमदार अभय पाटील हांका बरी लडत दिली. एकीकरणाच्या हेर चार उमेदवारांक व्हडलीशीं मतां मेळपाक शकलीं ना. बेळगांवाचें महाराष्ट्रांत विलिनीकरण करपाक सोदपी महाराष्ट्र एकीकरण समितीक व्हो एक व्हडलो धपको बसला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
