भांगरभूंय | प्रतिनिधी
भांगरभूंय । खेळां मेज
पणजीः बीपीएस राज्य मानांकन टॅनीस सर्तींत आश्विन चांदोईकान निकुंज गुप्ताक हारोवन दादलल्यांच्या 45 वर्सां पिरायेच्या गटांत एकोडीचे फायनलींत प्रवेश केलो. 55 वर्सां परस चड पिरायेच्या गटांत समीर काकोडकार आनी मनोज पांडेन एकोडीचे फायनलींत प्रवेश केलो.
मनोज पांडेन रॉबर्ट डिसोझाक 6-0, 6-9 अशें हारयलें. समीर काकोडकारान मायकल व्हिएगशाक 6-1, 6-0 अशे हारोवन फायनलींत प्रवेश केलो. उपांत्यपूर्व फेरयेंत ब्रायन फर्नांडीसाक हारोवपी गुप्ताक उपांत्य फेरयेंत चांदोईकान दोन सेटांत 6-4, 6-2 अशें हारयलें. किशोर मेट्री आड 6-2 अशें जैत मेळोवन गुप्तान उपांत्य फेरींत प्रवेश केल्लो.
उपांत्यपूर्व फेरयेंत दिमित्री स्मरनोव्हान प्रसाद फडतेक 6-2 अशें हारयलें. जाल्यार नोएल नोऱ्होनात राजेश बुंदेलाक 6-0 अशें हारयलें. सर्तींतले हेर उक्ता गटांतल्यो टॅनीस मॅची 15 तें 20 मे मजगतीं जातल्यो. ब्रायन फर्नांडीसान मॅकेलरॉय बरेटोक 7-5 अशी मात दिली.
बीपीएस टॅनीस सर्तींत 126 खेळगड्यांनी वांटो घेतला. वेगवेगळ्या श्रेणी खातीर वट्ट 70 हजार रुपयाची इनामां दवोरल्यांत. तेजस शेवडे, मनो छाब्रा हांच्या सयत जायत्या अव्वल दर्जाच्या टॅनीसपटूं हे सर्तींत वांटेकार जाल्यात. ज्युनियर चॅम्पियन दश पै आनी तिथी भूमकार हांचोय सर्तींत आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
