भांगरभूंय | प्रतिनिधी
भांगरभूंय । प्रतिनिधी
पोरणे गोंयः अल्पसंख्यांकांच्या कल्याणा खातीर केंद्र तशेंच गोंय सरकाराच्या खासा येवजण्यो आसात. तांचो लाब घेवपा खातीर तांणी फुडें सरचें अशें आवाहन गोंय राज्य अल्पसंख्यांक अर्थीक आनी उदरगत म्हामंडळाचे चॅरमन आदले आमदार फ्रान्सिस सिल्वेरहा हांणी केलां. आगशी चर्च हॉलांत आयतारा आयोजीत केल्ले जाग्रुती कार्यावळीचें उक्तावण केल्या उपरांत ते उलयताले.
आमचे खातीर सरकारी कल्याण येवजण्यो आसात हाची म्हायती गोंयांतल्या अल्पसंख्यांक लोकांक खबर ना. ते खातीर ते ह्या येवजण्याचो लाब घेवपाक येनात आनी सरकारान जो निधी राखून दवोरला तो तसोच उरता अशें सिल्वेरान सांगलें.
सध्या म्हामंडळा कडेन 1 कोटी रुपयांचो निधी आसा. ताचो वापर जायना ते खातीर आमी निधी वाडोवन दिवचो अशें सरकाराक सांगपाक शकनात अशी म्हायती दितना सिल्वेरा हांणी अल्पसंख्याकांनी सरकारी येवजण्यांचो चडांत चड लाब घेवपाक फाटीं रावचें न्हय अशें आवाहन केलें. जे गरीब अल्पसंख्यांक आसात ताकां आपल्या पांयार उबे रावपा खातीर आमचे यत्न सुरू आसात. लोक फुडें येनात आनी आमकां आमचें काम करपाक मेळना अशें ताणे सांगलें.
अल्पसंख्यांक म्हामंडळाच्या अधिकाऱ्यांनी जाग्रुती कार्यावळींत वेगवेगळ्या येवजण्यांची म्हायती दिली. टर्म लोन, आप रोजगार, हातकाम, मायक्रो अर्थ येवजण्याची तांणी म्हायती दिली. सरकारी येवजण्या खाला एक लाख रुपयांचे रीण घेवपा खातीर सरकारी नोकरी आशिल्लो हमीदार म्हणून दिवपाचे सक्ती विशीं आक्षेप घेतलो. सरकारी नोकरी आशिल्लो कोणूय हमीदार म्हणून रावपाक तयार ना अशें कार्यावळीक हाजीर आशिल्ल्या एकल्यान सिल्वेरा हाचे नदरेक हाडून दिले.
अल्पसंख्यांक अर्थीक उदरगत म्हामंडळाचो वेवस्थापकीय संचालक अजित पंचवाडकार. मंडळाचे संचालक सलील इसानी, सेबी फर्नांडीस, गिल्बर्ट फर्नांडीस आनी डायनो कोरगांवकार, आगशीची सरपंच इमी फर्नांडीस, नेवराची सरपंच सुनिता नायक, शिरिदांवची सरपंच सुवर्णा कुकळ्ळीकार, भाटीचो सरपंच मांझेल फर्नांडीस कार्यावळीक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
