भांगरभूंय | प्रतिनिधी
भांगरभूंय । प्रतिनिधी
पेडणेः वर्सावळी प्रमाण मे म्हयन्यांत दर्या देगांनी व्हांवन येवपी तेल तवंगाक (टॉर बॉल) लागून मोरजी आनी मांद्रेची दर्या वेळ विद्रूप जाल्या. दर्या वेळेर न्हांवपाक येवपी पर्यटक आनी थळाव्या लोकांक हाचो बरोच त्रास जाता. गिमाळ्याच्या दिसांनी थळावे लोक खाऱ्या उदकांक न्हांवपाक येतात. तेल तवंगाक लागून लोकांक त्रास जाता हें खबर आसून लेगीत सरकारी यंत्रणा ते विशीं कांय करना हे खातीर लोक नाराजी उक्तायतना दिसतात.
उदक आनी वायू प्रदूशणाक लागून हो प्रकार जाता. शिवाय दर्यांतल्यान व्हडल्यो बोटी यो-वच करतात. जळल्ली ऑयल दर्यांत सोडपाचो गैर प्रकार तांचे कडल्यान जाता. तेलाचे तवंग रेवेंत मिस्तुराद जावन ताचे टार बॉल जातात अशें पर्यावरण अभ्यासक राजेंद्र केरकार हाणे तांचे कडेन संपर्क सादलो तेन्ना सांगलें.
तेल तवंगाक लागून पेडणे तालुक्यांतल्यो दर्या वेळो विदूप जाल्यात. लोकांच्या पांयांक व्हो तवंग चिकटता. ताका लागून लोक दर्या वेळेर येनात अशें दिसपाक लागलां. दर वर्सा व्हो प्रकार जाता. मात सरकार ते विशीं कसलीच उपाय येवजण करना. दर्या वेळो नितळ दवोरपाचें कंत्राट घेतिल्ल्यो कंपन्यो तवंग मिस्तुरात जाल्ली रेंव काडपाचें काम करनात.
मोरजी दर्या वेळेर दर वर्सा टार बॉल पातळटात. पर्यटनाचेर ताचो परिणाम जाता अशें पर्यटन वेवसायीक विनोद पेडणेकारान सांगलें. पोरूं मोरजे दर्या वाठारांत टार बॉल एकठांय करून दवरिल्ले. तीन म्हयन्यां आदीं तांका उजो लागल्लो. टार बॉल एकठांय करून तांचो विलो लावपाची वेवस्था करपाची मागणी अमित मोर्जे, अल्बर्ट फर्नांडीस हांणी केल्ली. मात पर्यावरण खातें वा पर्यटन खात्यान ताचे कडेन लक्ष दिलें ना. दर्या पर्यावरणाक बादिकारक थारपी तेल तवंगाचेर उपाय येवजण करपाची गरज आसा अशे तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
