भांगरभूंय | प्रतिनिधी
आयच्यान कार्यवाही; उपजिल्होधिकाऱ्यांची मनमानी ?
भांगरभूंय । प्रतिनिधी
म्हापशें: म्हापशें सरकारी संकूल ही बार्देस म्हालांतली म्हत्वाची सुवात. दर दिसा शेंकड्यांनी लोक आपल्या कामां खातीर ह्या संकुलांत येतात. हें भौशीक संकूल आसून लेगीत थंय फक्त कर्मचारी वर्गाच्याय गाडयांक प्रवेश दितले. असो आदेश उपजिल्होधिकाऱ्यान काडला. ताका लागून सर्वसामान्य लोकांची सोमार 15 मे सावन व्हड गैरसोय जातली.
ह्या संकूल वाठारांत पार्किंगची व्हड समस्या आसा. अधिकारी वर्गाक तांच्यो गाडयो पार्क करपाक सुवात मेळना. तशेंच त्या वाठारांत व्हड संख्येन येवपी गाडयांक लागून थंय येरादारीची कोंयडी जाता. तशेंच ह्या संकुलांत अतिरिक्त जिल्होधिकारी, उपजिल्होधिकारी, मामलेदार, गटविकास अधिकारी, भौशीक बांदकाम खात्याचें रस्तो, इमारत, उपनगर नियोजक, उपकामगार आयुक्त, कर, नागरी पुरवण, सर्व्हेक्षण, तलाठी हे सारकीं कार्यालयां आसात. इतलीं कार्यालयां आसून लेगीत थंय पार्कींगचो उणाव आसा.
ह्या कार्यालयांनी काम करपी कर्मचारी दुचाकी वा चारचाकी गाडयांतल्यान येतात. तांकांच थंय सध्या पार्कींगे खातीर सुवात ना. ते भायर इमारतीचे फाटले वटेंतली कोसळिल्ली राखणे वणत अजून दुरुस्त करूंक ना. तशेंच वाहन पार्कींगचें थंय योग्य नियोजन केल्लें ना. ताका लागून ह्या संकुलांत व्हड संख्येन येवपी लोकांक तांच्यो गाडयो पार्क करचे खातीर सुवात मेळना. अशा वेळार आतां उपजिल्होधिकाऱ्यान फक्त कर्मचारी वर्गाकूच थंय गाडयो पार्कींगची मेकळीक दिल्या. हेरांनी आपल्यो गाडयो भायर पार्क करच्यो, असो निर्णय दिला. ते प्रमाण संकुलांतल्या सगळ्या कार्यालयीन अधिकाऱ्यां कडल्यान तांच्या कर्मचाऱ्यांची नांवां घेवन त्या कर्मचाऱ्यांक गाडयेचे पास दिल्यात. हो पास नाशिल्ल्यांक संकुलांत प्रवेश दिवचो न्हय, असो तोंडी आदेश उपजिल्होधिकाऱ्यान दिला. ह्या आदेशाची कार्यवाही जावची हे खातीर चार पुलिसांची नेमणूक केल्या.
समस्या कोणा कडेन मांडच्यो?: म्हापशेंकार
कसलेंच योग्य नियोजन आनी सर्वसामान्य लोकांची गाडयांची पार्कीगची योग्य वेवस्था करिनासतनाच भायले भायर निर्णय ह्या संकुलांतल्या अधिकाऱ्यांनी घेतला. आदींच म्हापशें शारांत पार्कींगची समस्या आसा. अशे स्थितींत सरकारी अधिकारी जर भौशीक सुवातांचेर अशे तरेन लोकांक त्रास जावपी निर्णय एकाद्या खाजगी आस्थापना प्रमाण घेवपाक लागले जाल्यार लोकांनी कोणा कडेन समस्या मांडच्यो, असो प्रस्न म्हापशेंकारांनी उपस्थीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
