भांगरभूंय | प्रतिनिधी
फोंडें: कुळण- सावयवेऱ्यां शेनवारा रातच्या वेळार लोकवस्तींत आयिल्लो बिबटो पाळीव सुण्यां पासून सुटका घेवचे खातीर जिवाच्या आकांतान माडार चडलो. सुण्यांच्या भंयान ताका आयतारा दीसभर उपाशी पोटार कवाळ्यांत रावचें पडलें.
थळाव्या लोकांनी दिल्ले म्हायती प्रमाण शेनवारा राती वेळार बिबटो लोकवस्तींत आयलो. घडये उदका खातीर तो आयिल्लो आसतलो, असो अदमास लोकांनी उक्तायलो. त्या वेळार सुमार 5-6 पोशिल्ल्या सुण्यांनी ताका आडावन दवरलो. जिवाच्या आकांतान तो माडार चडलो. पूण सुणीं माडा पोंदा बसून राविल्ल्यान ताका खाला देंवपाक जालें ना.
सकाळीं खूब नाल्ल जमनीर पडिल्ल्यान आनी माडा पोंदा सुणीं बशिल्ल्यान कांय जाणांची सहज नदर वयर माडार गेली. त्या वेळार कवाळ्यांत बिबटो बशिल्ल्याचें दिसलें. ते उपरांत तांणी फोंडेंच्या रान खात्याच्या कार्यालयाक हाची म्हायती दिली. फोंडें रान विभागाचे अधिकारी दीपक तांडेर आनी हेर कर्मचारी तशेंच फोंडें पुलीस घडणुकेचे सुवातेर पावले. माडार बिबटो आशिल्ल्याची खबर गांवांत वाऱ्या भशेन पातळ्ळी. ताका लागून खूबश्यां लोकांनी थंय गर्दी केली. हे गर्दीक लागून रान खात्याच्या अधिकाऱ्यांक त्या बिबट्याक खंयच्यान काडपाक कांय प्रमाणांत आडखळ जाली. आयतारा सांजे उसरां मेरेन बिबट्याची कवाळ्यांतल्यान सुटका करपाचे यत्न चालू आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
