गावणें- बांदोड्यां शेतांत खारें उदक

भांगरभूंय | प्रतिनिधी

सुमार 25 शेतकारांचें लुकसाण; पावसाळ्या आदीं मानशेचीं दारां बंद करपाची सरकारा कडेन मागणी

भांगरभूंय । प्रतिनिधी

फोंडें: गावणें- बांदोडें वाठारांत खारें उदक शेतांत घुशिल्ल्यान शेतां सयत माड, माडयो, पणस, मिरी आनी हेर झाडां करपल्यांत. ताका लागून सुमार 20-25 शेतकारांचें व्हड लुकसाण जालां. सुमार 6-7 लाख रुपयांचें लुकसाण जाल्ल्याचो अदमास आसा.

फाटल्या 6-7 म्हयन्यां सावन खारें उदक शेतांत घुसता. अजून मेरेन सरकारा वतीन उपाय काडपाचो यत्न जावंक ना. बांदोडें आनी मडकयचे शिमेर आशिल्ले मानशेचीं दारां बंद केलीं जाल्यार खारें उदक घुसपाचो प्रकार रोखडोच बंद जावपाक शकता. ते खातीर सरकारान पावसाळ्यां आदीं मानशेचीं दारां बंद करून थाकाय दिवची, अशी मागणी शेतकारांनी केल्या.

स म्हयन्यां आदीं मानशेचीं दारां उक्तीं केल्ल्यान गावणेंच्या शेतांत खारें उदक घुसून बागायती तशेंच शेतां नश्ट जाल्लीं. ह्या वाठारांतले 350 परस अदीक माड- माडयो करपून व्हड लुकसाण जालां. ताका लागून शेतकार सध्या सरकाराचे मजतीची वाट पळयतात.

एका म्हयन्या आदीं थळाव्या सरपंचाक हाची म्हायती दिले उपरांत पळोवणी करून विवीध खात्यांक निवेदनां दिल्लीं. पूण अजून मेरेन सरकारान शेतकारांचो प्रस्न गंभीरपणान घेवंक नाशिल्ल्यान शेतकारांनी नाराजी उक्तायल्या. खाऱ्या उदकाचो मार वेलींग वाठारांतल्या शेतकारांक लेगीत बसला. ताका लागून लुकसाणीचो आंकडो आनीक वाडपाची शक्यताय आसा.

हे संबंदांत अदीक म्हायती दितना शशिकांत गावडे हांणी सांगलें, 6-7 म्हयन्यां सावन खारें उदक शेतांत घुसून माड- माडयो आनी हेर झाडां करपल्यांत. ताका लागून शेतकारांचें व्हड प्रमाणांत अर्थीक लुकसाण जालां. पावसाळ्या आदीं मानशेचीं दारां बंद केलीं ना जाल्यार, शेतां सोडपाचो वेळ शेतकारांचेर येतलो. सरकारान हाचेर गंभीरपणान लभ घालून शेतकारांक थाकाय दिवची, अशी तांणी मागणी केली.

म्हाद्दू नायक हांणी सांगलें, खाऱ्या उदकाक लागून शेतांचें लुकसाण जालां. सरकारान हाची वेळार दखल घेवंक ना जाल्यार फुडारांत शेतां इतिहास जमा जातलीं. ताका लागून सरकारान ताकतिकेन मानशेचीं दारां बंद करून खारें उदक आडावपाचो यत्न करपाक जाय, अशें तांणी सांगलें.

सरकारान गांभिर्यान लक्ष घालचें: जुझे सिल्वेरा

पुर्वजांनी लायिल्ली बागायत फाटल्या स म्हयन्यांत खाऱ्या उदकाक लागून नश्ट जावपाच्या मार्गार आसा. बागायतीची सद्दां जतनाय घेताले. पूण खाऱ्या उदकाक लागून माड आनी माडयो करपतात तें पळोवन दुख्ख जाता. सरकारान हे संबंदांत लक्ष घालून शेतकारांक उर्बा दिवचे खातीर यत्न करपाक जाय, अशें जुझे सिल्वेरा हांणी सांगलें.

फुडल्या सप्तकांत करतले पळोवणीः सरपंच

खारें उदक शेतांत घुशिल्ल्याची खबर कळटाच थळावे पंच व्यंकटेश नायक आनी आपणे वचून पळोवणी केल्ली. ते संबंदांत विवीध खात्यांक निवेदनां दिवन ताचेर योग्य उपाय काडपाची पंचायती वतीन मागणी केल्ली. ते प्रमाण फुडल्या सप्तकांत जोडरितीन पळोवणी करतले, अशें बांदोडेंचे सरपंच सर्वानंद कुर्पासकार हांणी सांगलें.