भांगरभूंय | प्रतिनिधी
जपानी लोकवेदांत आनी साहित्यांत माजरांचो मोट्या प्रमाणांत उल्लेख मेळटा. जपानी समाज माजरांक खूब मान दितात आनी तांकां बर्या नशिबाचें चिन्न वा बर्या पांयगुणाचें प्रतीक अशें मानतात. कांय आंतरराष्ट्रीय मळा वेले जपानी लेखक आपल्या पुस्तकाच्या कथानकांत माजरांक दर्शायतात. हारुकी मुराकामी जांव वा सॉसुके नाटसुकावा वा हेर जपानी लेखकाच्या पुस्तकांनी वाचकांक वागाची मावशी सांपडटाच.
सॉसुके नाटसुकावा हे नामनेचे जपानी लेखक. ‘द कॅट व्हू सेव्ड बुक्स’ ही तांची पयली कादंबरी. ही कादंबरी 2021 वर्सा पिकादॉर हे प्रकाशन संस्थेन उजवाडाक हाडली. कादंबरीचें मुखपृश्ट तोखणायेचें. पुस्तकांचें राशीचेर एक बुकलो बसून वाचकांक कादंबरी हातांत घेवपाक आग्रो करता. कादंबरीचें लिखाण जपानी साहित्याचे शैलींत बेस बरे तरेन बसता. कथानकांत एक रम्य वातावरण तयार जाता आनी वाचकांक पुस्तक वाचतना मनोरंजन आनी आनंद खूब मेळटा. कांय जपानी लेखक अशेंच बरयतात. फॅण्टसी वा काल्पनीक जग आनी एडवॅन्चर वा साहसी जपानी साहित्य वाचकांक खूब अणभवंक मेळटा.
रिंतारो नांवाचो एक चलो हे कादंबरेचें मुखेल पात्र. रिंतारो आनी ताचो जाणटो आजो एक पुस्तकालय चलयतात. ताचो आजो मरतगीर रिंतारोचेर तें पुस्तकालय बंद करून आपल्या सोयर्यागेर रावपाची पाळी येता. ताच्या मनांत वचपाचें नासता. पुस्तकां मदीं ल्हानाचो व्हड जाल्लो रिंतारो साहित्य प्रेमी आसता आनी आपल्या आज्याचें दुकान ताका सोडून वचपाची मातूय इत्सा नासता. अशेंच एक दीस रिंतारोक टायगर नांवाचो बुकलो सांपडटा. हो बुकलो ताच्या दुकानांत चलत येता आनी ताचे कडेन उलोवंक लागता. टायगर रिंतारोक पुस्तका वाचोवपाच्या एका प्रवासार व्हरता. रिंतारोक कांय विचित्र, काल्पनीक वा विलक्षण पात्रां सांपडटात, जांकां पुस्तकांचो विध्वंस जाल्लो जाय आसता. टायगर आनी रिंतारो अशा कांय पात्रांचे तावडेंतल्यान पुस्तकांक वाचयतात.
पुस्तकाचे सुरवातेक रिंतारो एक नेर्वोझ, भिजूड भुरगो आसता. टायगर रिंतारोचो आत्मविश्वास वाडावपाच्या प्रयत्नांत यशस्वी जाता. रिंतारो आपल्या आज्याच्या मरणाच्या दुख्खांतल्यानूय मुक्त जाता. हें पुस्तक वाचकांचे कल्पनाशक्तेक पालव दिता आनी वाचकांक पुस्तक वाचतना एके वेगळेच तरेची शांतताय आनी खोस अणभवता. पुस्तक वाचूंक वयाचें बंदन ना. ह्या सुंदर कथानकेचो आस्वाद भुरगीं आनी जाणटीं घेवंक शकतात.
द कॅट व्हू सेव्ड बुक्स एक बेस बरी कादंबरी. पुस्तकांत कांय जड विचार आसून लेगीत वाचकांचें मन जड जायना. एक उत्साही काणयेचें हें पुस्तक सगळ्यांनी वाच्चें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
