भांगरभूंय | प्रतिनिधी
लखनौ सुपर जायण्ट्सान बाबत सुरवाती उपरांत लेगीत येजमान सनरायझर्स हैदराबादाक हारयलो. हैदराबादाचे खेळपट्टीचेर बॅटींग करप तशें सोंपें नाशिल्लें. पूण, प्रेरक मंकड आनी मार्कस स्टॉयनीस ही जोडी खेळपट्टीचेर तग धरून रावली. सनरायझर्स हैदराबादाच्या बॉलरांक पयल्या 10 ओव्हरींतलें सातत्य दुसऱ्या टप्प्यांत राखपाक जमूंक ना आनी हाचोच लखनौन फायदो घेतलो.
ह्या जैता सयत लखनौ गुणतकट्यांत 13 गुणां सयत चवथे सुवातेर उडी घेतली आनी हैदराबादाचें पॅकअप केलें. अभिषेक शर्मान घाल्ली 16वी ओव्हर मॅच घुंवडावपी थारली. हे ओव्हरींत पांच सके मारले.
सनरायझर्स हैदराबादान 20 ओव्हरींनी 6 182 धांवड्यो केल्यो. लखनौ सुपर जायण्ट्सान 19.2 ओव्हरींनी 3 विकेटी वगडावन 185 धांवड्यो करून जैत जोडलें.
सनरायझर्स हैदराबादाच्या बॉलरांनी सुरवाती सावन बरी बॉलींग घालून कायले मायर्साक बांदून दवरलो. हाका लागून ताणें आपली विकेट वगडायली. ग्लॅन फिलिप्साच्या बॉलाचेर मायर्स 14 बॉलांनी फकत 2 धांवड्यो केल्यो.
हैदराबादाची बॉलींग उत्कृश्ट चालू आशिल्ली आनी सातवे ओव्हरींत क्विटनान एक सको आनी एक चवको मारलो. पूण, मयांक मार्कंडेच्या बॉलाचेर रिव्हर्स स्विप करपाच्या यत्नांत क्विंटन (29) कॅच बाद जालो. लखनौक 10 ओव्हरींनी 2 विकेटी वगडावन 68 धांवड्यो करप शक्य जाल्यो. प्रेरक मंकड आनी मार्कस स्टॉयनीस हांचेर सगली भिस्त आशिल्ली. प्रेरकाचे बॅटिंगेक लागून लखनौची आस्त जिवी उरली.
मंकड आनी स्टॉयनीस हांणी 38 बॉलांनी अर्द शेंकड्याची भागिदारी केली. लखनौक 36 बॉलांनी 80 धांवड्यो करपाची गरज आशिल्ली. प्रेरकान 35 बॉलांनी अर्द शेंकडो पुर्ण केलो. 16वे ओव्हरींत अभिषेक शर्माचे ओव्हरींत स्टॉयनीसान दोन सके मारले. पूण, तिसऱ्या बॉलाचेर आनीक एक सको मारपाच्या यत्नांत तो बाद जालो. स्टॉयनीसान 25 बॉलांनी 2 चवके आनी तीन सक्यां सयत 40 धांवड्यो करून बाद जालो. प्रेरका वांगडी ताची 73 धांवड्यांची भागिदारी सोंपली.
ते उपरांत मैदानांत देंवपी निकोलस पुरनान तीन सके मारले. अभिषेकान ते ओव्हरींत पांच सक्यांचे मजतीन 31 धांवड्यो दिल्यो. हे ओव्हरीक लागून लखनौची जैताची आस्त वाडली. ताका 24 बॉलांनी 38 धांवड्यो अशें अंतर उणें जालें. पुरन आनी प्रेरक हांणी उरिल्ल्यो धांवड्यो सहज काडल्यो. प्रेरकान 45 बॉलांनी सात चवके आनी दोन सक्यांचे मजतीन नाबाद 64 धांवड्यो केल्यो. पुरनान 13 बॉलांनी 3 चवके आनी चार सक्यांचे मजतीन 44 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
