भांगरभूंय | प्रतिनिधी
आमदार डॉ. देविया राणे: ठाण्यां राज्य पांवड्या वयले महिला क्रिकेट लीग सर्तीचें उक्तावण
भांगरभूंय । प्रतिनिधी
वाळपयः दरेकल्यान उण्यांत उणो एक तरी खेळ खेळप खूब गरजेचो. भलायकी तंदुरुस्त दवरचे खातीर खेळ हो म्हत्वाचो पांवडो. ताका लागून दरेकल्यान इल्लो वेळ मैदानार सारचो. मात शिक्षणा कडेन आडनदर जावची ना, हाची विशेश जतनाय घेवची. चड करून विद्यार्थ्यांनी खेळां वांगडाच शिक्षणाक तितलेंच म्हत्व दिवचें, अशी विनवणी आमदार डॉ. देविया राणे हांणी केली.
ठाणे प्रीमियर लीग हांचे वतीन आयोदीत केल्ल्या दुसरे गोंय राज्य पांवड्या वयले महिला क्रिकेट लीग सर्तीच्या उक्तावण सुवाळ्यांत डॉ. राणे उलयताली. मंडळ कोळगिरो मैदानार आयोजीत केल्ले हे सर्तीचें उक्तावण डॉ. राणे हांचे हस्तुकीं परंपरीक दिवली पेटोवन आनी करंडकाचें अनावरण करून जालें.
ह्या वेळार माचयेर केरी जिल्हो पंचायत वांगडी देवयानी गांवस, ठाणेची सरपंच सरिता गांवकार, उपसरपंच तनया गांवकार, पंच सोनिया गांवकार, अनुष्का गांवस, निलेश परवार, सुरेश आयकार, सुभाष गावडे, आदले जिल्हो पंचायत वांगडी पांडुरंग गांवकार, सत्तरी पत्रकार संघाचे अध्यक्ष उदय संवात, राज्य पांवड्या वयली महिला क्रिकेट खेळगडी सुनंदा यात्रेकार, देवस्थानाचे उत्तम गांवकार, पंचायत सचीव सर्वेश गांवकार, विवीध संघांचे धनी, आयोजक समितीचे पदाधिकारी आनी हेर मानेस्त हाजीर आशिल्ले.
डॉ. राणे हांणी सांगलें, सत्तरी म्हालाच्या गांवगिऱ्या वाठारांनी लेगीत आतां बायलां खातीर राज्य पांवड्यार क्रिकेट सर्तीचें आयोजन जाता, ही खऱ्यांनीच तोखणायेची गजाल. हाचे वयल्यान सत्तरी म्हाल सर्तीच्या आयोजनांत फाटीं ना हें आतां सिद्ध जालां. फुडारांत गांवगिऱ्या वाठारांतल्या बायलांक बरी संद मेळची हे खातीर ठाणे प्रीमियर लीग सर्तीच्या माध्यमांतल्यान तरणाटे करतात तो वावर अभिमानाचो आसा. फुडारांतूय अश्यो सर्ती आयोजीत करून आपल्या गांवगिऱ्या वाठारांतल्या बायलांक आनी भुरग्यांक उर्बा दिवपाचो नेमान यत्न करचे. ह्या वावरांत गरजेचो तेंको दिवपाचें उतर डॉ. राणे हांणी ह्या वेळार दिलें.
उक्तावण सुवाळ्यांत बाल भवना वतीन नाचाचेर आदारीत येवकार गीत सादर केलें. गांवकार हांणी सुत्रसंचालन केलें जाल्यार पांडुरंग गांवकार हांणी उपकार मानले. हे सर्तींत राज्यांतल्या वट्ट पांच महिला पंगडांनी वांटो घेतला.
बायलांक उर्बा दिवपाचो वावर अभिमानाचोः सुनंदा यात्रेकार
एका काळार सत्तरी म्हालाच्या गांवगिऱ्या वाठारांत बायलांनी क्रिकेट खेळप हें समाजाक मान्य नाशिल्लें. बायलां खातीर कसल्योच सर्ती जाय नाशिल्ल्यो. आयज परिस्थिती पुराय बदल्ल्या. ठाणे सारकिल्ल्या गांवगिऱ्या वाठारांत राज्य पांवड्यार बायलां खातीर क्रिकेट सर्त आयोजीत करून बायलांक उर्बा दिवपाचें काम खऱ्यांनीच दरेकल्या खातीर अभिमानाचें आसा. अश्या सर्तींच्या माध्यमांतल्यान दरेकल्यान खेळा कुळशटायेक म्हत्व दिवचें, अशी सुनंदा यात्रेकार हांणी विनवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
