भांगरभूंय | प्रतिनिधी
भांगरभूंय । प्रतिनिधी
फोंडेंः सनातन संस्थेचे संस्थापक डॉ जयंत आठवले हांचो 81वो वाडदीस अंदू ब्रह्मोत्सव म्हणून मनयलो. संस्थेचे गोंय, महाराष्ट्र आनी कर्नाटक राज्यांतल्यान सुमार 10 हजार साधक ते खातीर आयिल्ले. फर्मागुडेर गोंय अभियांत्रिकी म्हाविद्यालयाच्या मैदानार ब्रह्मोत्सव आयोजीत केल्लो. तिरूपतीच्या बालाजी देवस्थानांत भांगरारथांतल्यान बालाजीची शोभायात्रा काडटात ताका ब्रह्मोत्सव म्हणटात. डॉ जयंत आठवलेची अशी रथयात्रा साधकांनी काडली.
झारखंड हांगचे प्रदीप खेमका, ताचीं घरकान्न सुनिता खेमका, दिल्लींतले संजीवकुमार, पितांबरी उद्देग समूहाचे रवींद प्रभुदेसाय आनी कर्नाटकांतले अॅड कृष्णमूर्ती हांणी कार्यावळींत आपलें मनोगत उक्तायलें. राष्ट्रीय स्वयंसेवक संघाचे गोंय संघचालक राजन भोवे, म्हार्दोळच्या म्हालसा देवस्थानाचे अध्यक्ष प्रेमानंद कामत, गोमंतक संत मंडळाचे संचालक सुहासबुवा वझे, गोमंतक मंदिर म्हासंघाचे अध्यक्ष भाई पंडित आनी कोंकणी साहित्यीक महेश पारकार हाजीर आशिल्ले.
कार्यावळीचे सुरवेक 2021 वर्सा तयार केल्ल्या आठवले हांच्या वाडदिसाचो लघुपट दाखयलो. उपरांत रथयात्रेंत धर्मध्वज, मंगलकलश घेतिल्लो सुवासिनीं आनी हेर साधकांनी आठवले हांची रथयात्रा काडली. रथातं आठवले हांची आध्यात्मीक उत्तराधिकारी बिंदा सिंगबाळ आनी अंजली गाडगीळ आशिल्ली.
डॉ आठवले हांच्या वाडदिसा निमतान एप्रील आनी मे ह्या दोन म्हयन्यांत सनातन संस्थे वतीन देशांत हिंदू राष्ट्र जाग्रुती अभियान चालीक लायलां. आतां मेरेन ताचे वतीन पोरण्या देवळांची नितळसाण, हिंदू राष्ट्र स्थापने खातीर सामूहीक प्रार्थना, प्रवचना आनी हिंदू एकता दिंडी काडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
