पर्वरी मार्केटांतल्या दुकानांची रोखडीच पावणी

भांगरभूंय | प्रतिनिधी

भांगरभूंय । प्रतिनिधी
पर्वरीः पर्वरी हनुमान संस्थाना लागीं बांदल्ल्या मार्केट प्रकल्पांतली दुकानां आनी ऑफिस सुवातांची निमाणे पावणी करपाचो निर्णय गोंय हावसिंग बोर्डान घेतला. ह्या प्रकल्पांत 61 दुकानां,  33 ऑफिसां, एक परिशद हॉल.  सामाजीक सभाघर आनी रेस्टॉरन्ट आसा.
2021 वर्सा 16 ऑगस्टाक मुख्यमंत्री डॉ प्रमोद सावंत हांणे ह्या प्रकल्पाचें उक्तावण केल्लें. उक्तावण जावंन 21 म्हयन्यांनी हावसिंग बोर्डान फाटल्या सप्तकांत फायर स्टेशना कडेन आशिल्ल्या पोरण्या मार्केटांतल्या दुकानदारांची बसका घेवन पावणेची खबर तांकां दिली.
पोरण्या मार्केटांतले दुकानदार नव्या मार्केटांत वचपाक तयार आसात. मात दुकानां विकतीं घेवपा खातीर हावसिंग बोर्डान जो दर थारायला ते विशीं ताचे मदीं नाराजी आसा. दर चड आशिल्ल्यांन तातूंत गुंतवणूक करपाक चडशे दुकानदार तयार नात. हावसिंग बोर्डान  वेपारी दुकानां मालकी तत्वाचेर विकतीं घेवपा खातीर 95 हजार रुपये चौखणी मीटर व्हो दर निश्चीत केला. चडश्या दुकानदारांनी तो तांकां परवडना अशें सांगलां.
हावसिग बोर्डान पोरण्या मार्केटांतल्या 40तल्या फकत 18 दुकानदारांक बसकेक आपयल्लें. पावणेच्या पयल्या टप्प्यांत ताका दुकानांचें वांटप करतले. सुपर बिल्टअपांतल्या 12 चौखण मीटर कार्पेट एरिया आशिल्ली दुकानां हावसिंग बोर्डान 27 लाख रुपयांक विकपाक काडल्यांत अशी म्हायती दुकानदारांनी भांगरभूंयक दिली. व्हो दर दुकानदारांक परवडना अशें सांगलें तेन्ना बोर्डाच्या अधिकाऱ्यांनी ताकां 25 वर्सांच्या लिजार घेवन चौखण मीटरा फाटल्यान 60 हजार रुपये डिपॉझिट भरून 25 वर्सांत म्हयन्याक 5 हजार 600 रुपये भाडें भरपाचो पर्याय दिला. मात दोनूय प्रस्ताव दुकानदारांनी न्हयकारल्यात.
पोराण्या मार्केटांतल्या दुकानदारांची नव्या मार्केटांत पुनर्वसणूक करतात ताका लागून तांकां परवडटा असो दर दिवचो अशी दुकानदारांची मागणी आसा, मात ती अधिकारी मानून घेवपाक तयार नात. हावसिंग बोर्डान दुकानदारांक तांचो निर्णय 15 मे मेरेन कळोवपाक सागला. उपरांत एक म्हयन्या भितर दुकानां आनी ऑफिसांची पावणी करतले. दुकानदारांनी ही गजाल पर्वरेचो आमदारआनी पर्यटन मंत्री रोहन खवंटे हांच्या कानार ही गजाल घालून ताका हस्तक्षेप करपाची विनवणी केल्या.