भांगरभूंय | प्रतिनिधी
भांगरभूंय । खबरां मेज
पणजीः राजस्थानातल्या भारतीय लष्कराच्या पोखरण चाचणी केंद्र वाठारांत 11 मे 1998 दिसा शक्ती-1 अणू क्षेपणास्त्राची येशस्वी चाचणी केल्ल्या दिसाच्या उगडासाक भारतात दर वर्सा 11 मे राष्ट्रीय तंत्रज्ञान दीस म्हणून मनयतात. त्या निमतान बिरेस्तारा राजभवनांत आयोजीत केल्ले कार्यावळींत राज्यपाल श्री. पी एस श्रीधरन पिल्लई हांणी भारतीय मजदूर संघ, जनसंघाचे संस्थापक आनी फुडारी दत्तोपंत ठेंगडी हांची भारताक अणुऊर्जा शक्ती करपाची दूरदृष्टी आनी कार्याचो उगडास करून तांका आर्गा ओपली.
केंद्रीय कामगार आनी रोजगार मंत्रालयाच्या दत्तोपंत ठेंगडी राष्ट्रीय कामगार शिक्षण आनी विकास मंडळाचे राष्ट्रीय अध्यक्ष . विरजेश उपाध्याय हांणी राजभवनार राज्यपालांची भेट घेवन दत्तोपंत ठेंगडी हांच्या जीवन कार्याचो उगडास म्हूण राज्यपालाक पारिजातकाचे रोप भेट दिले.
दत्तोपंत ठेंगडी हांच्या थर्ड वेव्ह ह्या पुस्तकाचो उल्लेख करून राज्यपालान खंयच्याय राष्ट्राच्या यशाखातीर वैज्ञानिक दृष्टिकोनाची गरज आशिल्ल्याचे म्हणलें. समाजाच्या फायद्या खातीर सैमीक आनी वैज्ञानिक गजालींचेर आदारीत हिंदू जीणेपद्धत फुडे व्हरपाची गरज आशिल्ल्याचेय तांणी म्हणलें. भारतीय मजदूर संघाचे राज्य सरचिटणीस के. प्रकाश, दत्तोपंत ठेंगडी राष्ट्रीय कामगार शिक्षण आनी उदरगत मंडळाची विभागीय संचालक श्रीमती अरुणा विष्णू वाघ, प्रादेशिक संचालक, दत्तोपंत ठेंगडी राष्ट्रीय कामगार शिक्षण आणि विकास मंडळ आनी शिक्षणाधिकारी प्रशांत इदवी हांची ह्या वेळार उपस्थिती आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
