भांगरभूंय | प्रतिनिधी
भांगरभूंय । प्रतिनिधी
काणकोणः शेताक लागपी आवतां. टॅक्टर, ट्रॉली आनी कीड नाशकां गोंयां भायर उण्या मोलांन मेळटात. ती दुसऱ्या राज्यांतल्यान हाडपाक शेतकारांक गोंय सरकारान मान्यताय दिवची अशी मागणी काणकोणचो प्रसाद वेळीप आनी हेर शेतकारांनी केल्या. अशें केल्यार कृशीं मालाक सरकाराक उणे अनुदान दिवपाक मेळटले आनी कृशी खात्याचे लाखांनी रुपये वाटावतले असो दावो तांणी चार रस्ते हांगा समुद्र मंथनाच्या सभाघरांत घेतिल्ले पत्रकार परिशदेंत केलो. अमेय पुराणीक, शाम देसाय आनी नरेश भंडारी ह्या वेळार हाजीर आशिल्ले.
शेत जमनींत चुनो घालपा खातीर गोंयांतल्या वितरकां कडल्यान 20 टन चुन्याचें कोटेशन घेतलें तेन्ना तें दोन लाखांच्या वयर गेलें. तोच चुनो शिर्शीच्यान हाडल्यार येरादारी खर्च वजा करून तो चुनो फकत 90 हजार रुपयांक मेळटा. ट्रेक्टराची ट्रॉली गोंयांत घेवपाक गेल्यार 2 लाख 35 हजार रुपये पडटात, तीच ट्रॉली कोल्हापूरच्या काणकोणा हाडपाक फकत 1 लाख 70 हजार रुपये पडटात अशें प्रसाद वेळीपान सांगलें.
शेतकी सामान विकते घेतल्यार कृशी खात्या वतीन शेतकारांक अनुदान दितात. गोंयां भायल्यान हाडल्यार तें मेळना. सरकारी अनुदाना खातीर माल राज्यांतल्या वितरकां कडल्यान विकतो घेवचो पडटा. कृशी खात्यान गोंय सरकाराचो अनुदान दिवपाचे पयशे वाटावपा खातीर गोंयां भायल्या राज्यांतल्यान कृशी मार हाडपाक परवानदी दिवची अशें अमेय पुराणिकान सांगलें. आमी कृशी संचालकाची भेट घेतली तेन्ना सरकाराच्या निर्णया आड कृशी खातें कांय करपाक शकना. शेतकरानी सरकारा कडेन चर्चा करची अशें ताणे सांगलें अशें वेळीपान सांगलें. कृशी मंत्र्याची भेट घेवपा खातीर वेळ मागलो तर तो मेळपाक शकलो ना अशी म्हायती ताणे दिली. खोतीगांवांत भाजयेचें उत्पादन व्हडा प्रमाणात जाता देखून थंय फलोत्पादन म्हामंडळान भाजी खरेदी केंद्र सुरू करपाची मागणी शेतकारानी केल्या अशें वेळीप हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
