भांगरभूंय | प्रतिनिधी
भांगरभूंय । प्रतिनिधी
पेडणेः पेडणे पालिका वाठारांत जमनीपोंदच्यान वीज केबली घालपाचें काम सुरू आसा. मात येरादारी आडमेळे येता तशेंच बेकायदेशीरपणान रस्तो खणल्ल्यान पेडणेचो नगराध्यक्ष सिद्धेश पेडणेकार, आदलो नगराध्यक्ष डॉ वासुदेव देशप्रभू आनी धारगळचो जिल्हो पंचायत वांगडी तुकाराम हरलमलकार हांणी मालपें वाठारांत विर्नोडें हांगा चलिल्लें काम बंद केलें.
पावस तोंडार आयिल्ल्यान खणपाच्या कामाक लागून वाहन चलयतल्यांक त्रास जावपाक लागला. ताका लागून अपघात जावपाची शक्यताय वाडल्या. पावस पडपाक सुरवात जातगीर येरादारीचो प्रश्न चड कुस्तार जातलो. ताका लागून हें काम बंद वडयलां आनी चवथी उपरांत तें परत सुरू करचें अशी सूचोवणी सिद्धेश पेडणेकारान संबंदीत कंत्राटदाराक केल्या. पावसाच्या दिसांनी गरज आसा तितलेंच काम करचें अशें ताणे सांगलां. मालपें तें पेडणे मार्केटा मेरेन रस्तो सामको अशीर आसा. थंयच्यान वाहनां सारकीं व्हरपाक मेळनात. पावसाच्या दिशांत ह्या रस्त्यार चिखोल जातलो. ताका लागून अपघात जातले हे गजाल मतींत दवोरून वीज केबल घालपाचें काम तूर्त बंद केलां अशें पेडणेकारान सांगलें.
बांदकाम खात्याच्या पेडणे रस्तो विभागाचो अभियंतो शिवानंद मळीक हांका पेडणेकार आनी देशप्रभून कामां संबंदीचे प्रश्न विचारलेय बांदकाम विभागान वीज केबल घालपाच्या कामान एनओसी दिल्या. रस्तो खणपाक परवानगी दिल्या अशें विचारलें तेन्ना शिवानंद मळीक हाणे बांदकाम खात्यान कसलेच परवाने दिले ना. मात उत्तर गोंय जिल्होधिकारी कार्यालया वतीन कामाचे सोपस्कार पुराय केल्यात अशें सांगलें.
कंत्राटदराच्या सुपरवायझरान ह्या वेळाळ नगराध्यक्षाक एनओसीचें पत्र दाखयलें मात तें रस्त्याचे कुशीक खणपा खातीर आसा असो तांतूंत उल्लेख आसा हे देशप्रभून कंत्राटदाराचे नदरेक हाडून दिलें. जमनीपोंदच्यान वीज केबल घालपा खातीर रस्तो खणून माती रस्त्यार वडयल्ल्यान येरादारीक आडमेळे जाता. कांय कडेन वाहन चालकांक लांबच्यान फेरो मारचो पडटा. ते खातीर तांणी नाराजी उक्तायल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
