भांगरभूंय | प्रतिनिधी
गोंय माध्यमिक आनी उच्च माध्यमिक शिक्षण मंडळाच्या बारावेच्या निकालांत सदचेवरीं चलयोच मुखार आसात. निकाल बरो लागिल्ल्यान फुडल्या शिक्षणाच्यो वाटो विद्यार्थी सोदता आसतले. तांच्या आवय- बापायन थारायलां जें तांकां मेळूंक ना, तें भुरग्यांक दिवपाचें. भुरगेपणात सपनां हजार, सातवेक पावता म्हणसर ध्येय निश्चिती खातीर, भुरग्याची आवड कितें आसा तें पळोवपाक अॅप्टीट्युड टेस्टय आतां घेतात. भुरग्याचे आवडी प्रमाण जाय तें शिक्षण संस्थेत, शाखेंत प्रवेश मेळ्ळोना जाल्यार निर्शेणी येवपाची शक्यताय आसता. नवी शिक्षणावस्था विद्यार्थ्यांक वेगळे वाटेन व्हरपी, तांकां निर्शेणेतल्यान भायर काडपीय आसा. तातूंतल्यान उच्च शिक्षणात नव्यो वाटो, मळां, दारां उगतीं जावंक लागल्यांत. नवे पर्याय मुखार सरकार दवरता तेन्ना अचूक दिका दाखोवपाची जापसालकी पालकांक घेवची पडटा. विद्यार्थ्यांची आवड म्हत्वाची, पूण तांकां मेळिल्ले मार्क (गुण) तितलेच म्हत्वाचे, ते पळोवनच मुखार वचपाचीं गणितां मांडप बरीं. सगल्यांत पयलीं भुरग्यांक एकच आत्मविश्वास दियात, भिवपाची गरज ना, मेकळें मळब तुजे पासत आसा, तूं फुडें वच, आमी तुज्या फाटल्यान आसात.
हाताचीं पांचय बोटां बारीकसाणेन पळयल्यांत? एकाच सारकीं आसात तीं? ना न्हय. मागीर एकच काम करात आपल्या भुरग्याची तुळा दुसऱ्या कडेन करूं नाकात, पयलो धांवता म्हणून ताचे फाटल्यान दुसऱ्यान धांवचें न्हय, धांवल्यारय वाट चुकल्यार कपलाक मिरयो कित्याक? खंत करीनासतना आपापले वाटेन वचपाक तयार रावात.
विज्ञान शाखेचें शिक्षण घेवन दोतोर, इंजिनियर जावपाचो हावेस सगलीं बाळगीतात. गोंयांतलें वैजकी महाविद्यालय, हें आशियांतलें पयलें. थंय दोतोरकेचें विंगड, विंगड शिक्षण मेळटा, पूण कितल्या विद्यार्थ्यांक पयल्या वर्साक प्रवेश मेळटलो? गोंय तंत्रिक म्हाविद्यालयाची वेबसायट ती म्हायती विद्यार्थ्यांक दिता. वाचल्यार एक गजाल कळटली फाटलीं कितलींशीच वर्सां तेंच चित्र आसा, व्हड बदल जाल्लो ना. कोविडाची साथ वाडपाक लागली तेन्ना शिक्षण खातें सांबाळपी मुख्यमंत्री डाॅ. प्रमोद सावंत हाणीं एक मंत्र दिलो, भिवपाची गरज ना. तेंच पालकांनी विद्यार्थ्यांक सांगचें, मुख्यमंत्री वा शिक्षण सचिवांनी ते विशीं कित्याक सांगचें न्हय?
दोतोर, इंजिनियर जावपा पासत देस पावंड्यार सर्तींत गोंयच्या विद्यार्थ्यांक हे फुडें देवचेंच पडटलें. हजारांनी सुवाती निमणे कडेन रित्यो उरतात, पयल्या रावंडाक अॅडमिशन मेळना जाल्यार दुसरो, तिसरो रावंड आसता. हालीं वर्सभर परीक्षा, अॅडमिशनाचें पर्व सुरू आसता, ट्युशन क्लासाच्या मुखेल्यांक म्हायती विचारात. सारकी म्हायती मेळना तो मेरेन प्रश्न विचारात, तुमकां फाव तशी जाप मेळटलीच अशें ना, पूण मार्गदर्शन जावपाक जाय. शाळांनी कावन्सेलर आसतात ते पालक, विद्यार्थ्यांचे मार्गदर्शक जाल्यार? भुरग्यांक उमळशीक आसता, फुडें वचपा खातीर तांकां योग्य मार्ग दाखयल्यार, भुरग्यांच्या मोबायला कडेन जोडून घेतल्यार विद्यार्थी भविष्यांत तांची याद करतले.
वैजकी, इंजिनियरिंग म्हाविद्यालयांनी जागो ना, उच्च शिक्षण दिवपी म्हाविद्यालयां, पाॅलिटेक्निकां आसात, कुशळताय शिक्षण आसा. फाटल्या वर्सा सावन शेतकाम, फॅशन टेक्नोलाॅजीचें शिक्षण गोंयांत मेळपाक लागलां. अंदूं कुशळतायेचें नवें आंगणच न्हय जाल्यार रातचें शिक्षण दिवपी म्हाविद्यालयां विद्यार्थ्यांची वाट पळयतात. वेबसायटीचेर सारकी म्हायती मेळ्ळी ना जाल्यार दिसाळीं विकतीं घेयात. एक तरी दिसाळें पालकांनी घेवचेंच, मुखेल खंयचें ताची जासूसी करून म्हायती मेळोवची. कोंकणी भांगरभूंय, इंग्लेज, मराठी भाशांतल्यान दिसाळ्यांनी जायराती येतात. त्यो वाचल्यार तुमी वाटावतलीं, दिसाळीं अजूनय वाट दाखयतात हें विसरूं नाकात. व्हिज्युअल मिडीया, वाॅटसअॅपार दिसाळ्यांतली म्हायती मेळटा पूण चडांत चड म्हायतीचें दार, वाटो म्हळ्ळ्यार दिसाळ्याचीं पानांच.
बीएस्ससी, एमएससी करून पीएचडीचे वाटेन कोयर वेवस्थापनांत डाॅक्टरेट मेळोवपाक गोंय विद्यापीठ आसा. सरकारी, प्रायव्हेट म्हाविद्यालयां नवे विषय शिकोवन विद्यार्थ्यांक नोकरी मेळोवपा खातीर आधार करतात. मोपा विमानतळान विमानतळ वेवस्थापन आनी हेर कुशळताय अभ्यासक्रमाचीं केंद्रां हाडल्यांत. एन आय टी, आय आय टी, पाॅलिटेक्निकांतल्यान नवे अभ्यासक्रम येवपाचे आसात. आयटीआयन कुशळताय केंद्रांचे नवें रुप घेतलां, पदवी शिक्षणा उपरांत सादयो मेळेकाराची देख घेवन हेरांकय आयटीआयन वचचें दिसता. कोविड सोंपतना शिक्षणाच्या नव्या पर्यायां वांगडाच उच्च शिक्षणाच्या वेळापत्रकांत बदल जाला. काॅमर्स, आर्टस शाखा वीस- पंचवीस नवो वाटो दाखयतात. सोदल्यार दोतोर, इंजिनियर पदव्यो वेगळे तरेन मेळोवपाक येतात, गोंयां भायल्या म्हाविद्यालयांनी अॅडमिशन घेवन. जंय अॅडमिशन घेतात तें म्हाविद्यालय सरकार, विद्यापीठा कडेन अॅफिलिएटेड आसतलें हाची जतनाय घेयात. बोगस कोचिंग, शिक्षण दिवपी धवे काळे आसचे ना अशें न्हय, ते खातीर सादूर रावचें पडटा.
वैजकी, अभियांत्रिकी, फार्मासी परीक्षा देस पावंड्या वेल्यो जातना सर्त वाडटलीच, पूण नव्या मळांची कवाडां उगतीं करपाची संद आसा.
मुळावें शिक्षण प्रादेशिक भासेंतल्यान घेवन शिक्षणाचीं फुडलीं सोपणां चडप बरें. एकचित्त जावन वाचन केल्यार, अभ्यास केल्यार बरे मार्क मेळटात. शिकतना सैमाच्या नव्या रुपां कडेन पळयतल्यांक सैम शिक्षणाची वाट आपसूक दिसता.
सेल्फ फायनान्सिंग अभ्यासक्रमांतल्यान म्हाविद्यालयांक नवे अभ्यासक्रम सुरू करपाक सरकारान मेकळेपण दिलां, पूण शिकोवपी उंचेल्या तांकीचे आसात? सरकार नव्या शिक्षण धोरणा वांगडा कागाळी, सुचवण्या खातीर आयोगाची बांदावळ करता? विद्यार्थी, पालकांक जोडून घेवपी आयोग, पालक शिक्षक म्हासंघ सरकाराची नदर आसची, नेमावळय बेगीन जावची. एकामेकां कडेन भासाभास करपी आॅनलाईन विद्यापीठां, शिक्षण पद्धती, प्रशिक्षण नवनिर्मणी करतली, भिवपाची गरज ना.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
