भांगरभूंय | प्रतिनिधी
शीत-कडी सयत हेर खाणांची वळख करून दिवपाचो उद्देश
भांगरभूंय । खबरां मेज
पणजीः जी 20 च्या विकासात्मक कार्यगटाचे बसकेंतली खाशेलपणां म्हणल्यार म्हत्वाच्या विशयांचेर विचारमंथन करपा वांगडाच गोंयचे पाककला संस्कृतीचो पुराय नमुनो सादर करपा खातीर नियोजनपूर्वक तयार केल्ली खाद्यपदार्थांची वळेरी. संवसारीक तशेंच शाश्वत उदरगतीच्या मुद्द्याचेर विचारमंथन करचे खातीर 9 ते 11 मे ह्या काळांत आयोजीत केल्ले बसके खातीर विवीध देशांतल्यान जी 20 चे निमंत्रीत प्रतिनिधी गोंयांत आयल्यात.
गोंयचे खाद्यपदार्थ, मसाले तशेंच विवीध स्वादांची अणभुती प्रतिनिधींक दिवपा वांगडाच गोंयची शीत- कडी आनी भाताच्या वेगवेगळ्या प्रकारांची वळख करून दिवप हो हे फाटलो विचार आसा. ते खातीर विवीध स्वाद, गोंयची पाककला, विनेगर, ताडी, सेंद्रीय तशेंच थळाव्यो भाजयो, नाल्ल, भारतीय मसाले अशे विवीध घटक आशिल्ले पदार्थ हे वळेरेंत आस्पावीत केल्यात.
सोया, सासवां, लॅक्टोज अशे विवीध पचनाशिल्ल्या घटकां संबंदांत केल्लें खास नियोजन बारीकसाणीन पाळ्ळां. तशेंच दरेका खाद्यपदर्था विशीं सगळी म्हायती प्रतिनिधींक सादर करपाची जापसालदारकी खाशेल्या संपर्क प्रतिनिधींचेर दिल्ली.
दर्यादेग वाठारांत व्हड प्रमाणांत जावपी नाल्लाच्या खाद्यपदार्था वयलो प्रभाव विवीध खाणांतल्यान दिसतालो. मटण, शागुती, व्हेजिटेबल फोगाट, गोंयची दाळमसाला, पनली बलसा हाचे सयत विवीध गोंयचे खाद्यपदर्थ सादर केले. कान्जा डी गलिना (पुर्तुगेज पद्दतीन तयार केल्लें चिकन सूप), पनीर पेरी- पेरी, चना- रस, भिंडी मसाला ह्या पदार्थ्यांचोय तातूंत आस्पाव आशिल्लो. तशेंच लोकप्रीय चिकन कॅफरील, मालवणी नुस्त्याची कडी हे पदार्थ लेगीत प्रतिनिधींत वाडटले. तशेंच गोंयचें फामाद खतखतें लेगीत रांदतले. तशेंच खाशेले गोंयचे मसाले आनी गोंयचे सेसिपी वरवीं तयार केल्ल्या विस्वणाच्या पदार्थ्यांचें प्रात्यक्षिकूय प्रतिनिधींक दाखयतले.
जेवणावळीचो शेवट अदीक गोड करचे खातीर मणगणें, डोसे डी ग्राव, सेरादुरा, बेबिन्का, दोदोल अशें नाल्ल, तांदळाचें पीठ, गोड आनी दाळी पासून तयार केल्ले विवीध गोड पदार्थ लेगीत प्रतिनिधींक वाडटले. हे लोकप्रीय आनी आवडीचे खाद्यपदार्थ भारतीय तशेंच पुर्तुगीज पाकसंस्कृती ह्या प्रदेशांतलो आगळो वेगळो सांगोड प्रतिबिंबीत करतात.
विवीध घटकांचो बारीकसाणीन विचारः विकास मोरोलिया
भारत विवीधतायेन नटला. हांगाचें सांस्कृतीक म्हत्व समजून घेवचे खातीर संवसारभरांतल्यान येवपी लोक, पर्यटकांनी गोंयच्या खाद्यपदार्थ्यांचो आस्वाद घेवपाकूच जाय. प्रतिनिधींचें पथ्यपाणी तशेंच भलायकेची स्थिती हे विशीं मेळिल्ले म्हायतीच्या आदारान आमच्या शेफानी लेगीत हे खाद्यपदार्थ रांदतना विशेश जतनाय घेतली, अशी म्हायती शेफ विकास मोरोलिया हांणी खाद्यपदार्थ रांदतना विवीध घटकांचो बारीकसाणीन केल्ल्या विचारा विशीं म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
