भांगरभूंय | प्रतिनिधी
मुरगांवः हेडलॅण्ड सडा वाठारांत कोयर प्रकल्पा कुशीक आशिल्ले मेकळे सुवातेचेर पालिकेन कोयर उडयिल्लो. त्या कोयराक 10 मेक अचकीत उजो लागलो. वास्को उजो पालोवपी दळाच्या आनी मुरगांव बंदर प्राधिकरण उजो पालोवपी दळाच्या जवानांनी येवन उजो पालयलो.
हेजलॅण्ड सडा वाठारांतल्या कोयर प्रकल्पा कुशीक कला आनी संस्कृती संचालनालयाची जमीन आसा. ते जमनीचेर आदले मंत्री मिलिंद नायक हांणी कोयर प्रकल्पांत सांठयिल्ल्या कोयराचेर प्रक्रिया करचे खातीर पुणेचे कंपनीक सुवात दिवन थंय कोयर प्रक्रिया प्रकल्प उबारिल्लो. तातूंत सांठयिल्लो शेकड्यांनी टन कोयराचेर प्रक्रिया करून सारें तयार केल्लें. उपरांत ते कंपनीचें कंत्राट सोंपले उपरांत तो प्रकल्प थंयच्यान काडिल्लो. मात पालिकेन थंय कोयर उडोवपाचें काम चालूच दवरिल्ल्यान थंय कोयराचो दोंगर जाल्लो आनी कोयर तसोच आशिल्लो. मजगतीं, 10 मेक त्या कोयराक अचकीत उजो लागलो आनी सगळ्याक धुंवर पातळ्ळो. थळाव्या लोकांनी हाची म्हायती उजो पालोवपी दळाक दिताच दळाच्या जवानांनी येवन उज्याचेर नियंत्रण मेळयलें. उजो लागपा फाटलें कारण स्पश्ट जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
