भांगरभूंय | प्रतिनिधी
म्हापशें: म्हापश्यां मार्केटांत आनी शारांत खूबशा बेकायदो वेवसायिकांनी सुवात आडोवन वेवसाय सुरू केल्यात. ह्या गैरप्रकाराक लागून चलपाक लेगीत फावोशी वाट मेळना. खूब खेपे तांणी केल्ल्या अतिक्रमणांचो येरादारीचेर परिणाम जाता. ते प्रमाण पालिकेन अतिक्रमण हटाव मोहीम सुरू केल्या. बुधवारा पयल्याच दिसा ह्या अतिक्रमणांचेर कारवाय करतना पांच ट्रक म्हाल जप्त केलो.
ह्या अतिक्रमण हटाव मोहिमे खातीर पालिकेन पालिका निरिक्षकांच्या दोन पंगडांची नेमणूक केल्या. त्या पंगडांत 10 कर्मचाऱ्यांचो आस्पाव आसा. बोडगिणी, गणेशपुरी, हावसींग बोर्ड, कोर्ट जंक्शन, पोरणी पालिका इमारत ह्या वाठरांत पंगडा वतीन कारवाय केली. हे कारवायेंत फळ विक्रेते धरून सायन बोर्ड, गाडे, दुकानां मुखार फुटपाथाचेर मांडिल्लें साहित्य जप्त केलें. मुख्याधिकारी अमितेश शिरवयकार हांणी सांगलें, पालिका वाठारांत वेवसायिकांनी खूब कडेन अतिक्रमण केलां. ताची दखल घेवन भौशीक नोटीस जारी करून संबंदितांक फावोसे वेळ दिल्लो, तरी लेगीत तांणी अतिक्रमण काडूंक नाशिल्ल्यान ही मोहीम हातांत घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
