भांगरभूंय | प्रतिनिधी
मुख्यमंत्री डॉ. प्रमोद सावंतः भाजपाची जैताची मिरवणूक
भांगरभूंय । प्रतिनिधी
दिवचलः सांखळी पालिका वाठारांतल्या लोकांच्या आनी कार्यकर्त्यांच्या आदारान सगळ्यो इकरा सुवात जिखून पुराय सत्त मेळयल्या. हो सांखळेकारां खातीर आनी भाजपा खातीर इतिहासीक खीण. सांखळेचो मास्टर प्लान पुराय करून आधुनीक येवजण्यांक चालना दितले. खूबशे प्रकल्प ताचे खाला पुराय करतले, अशें मुख्यमंत्री डॉ. प्रमोद सावंत हांणी सांगलें.
सांखळी पालिकेंत मेळयिल्ले जैत मनोवचे खातीर भाजपान सांखळी पालिका वाठारांत व्हड मिरवणूक काडली. तातूंत मुख्यमंत्री डॉ. सावंत हांचे सयत सगळे भाजपा पदाधिकारी गोपाळ सुर्लकार, कालीदास गांवस, संजय नायक, विश्वंभर गांवस तशेंच नव्यान वेंचून आयिल्ल्या सगळ्या नगरसेवकांनी वांटो घेतिल्लो.
देवदर्शन करून मिरवणुकेक सुरवात जाली.
नगराध्यक्षपदाचेर कोण, ह्या प्रस्नाक जाप दितना मुख्यमंत्र्यांनी सांगलें, पालिका मंडळाक विस्वासांत घेवन ताचेर निर्णय घेतले.
पुराय सांखळी वाठारांत भोंवले उपरांत रवींद्र भवनांत मिरवणुकेचो समारोप जालो. ह्या वेळार मुख्यमंत्री डॉ. सावंत हांणी मार्गदर्शन केलें. ह्या वेळार सगळ्यां खातीर स्नेहभोजनाची कार्यावळ आयोजीत केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
