भांगरभूंय | प्रतिनिधी
डॉ. विद्या गावडे: शांतादुर्गा महिला मंडळ गुळेली सत्तरी वतीन महिला उत्सव
वाळपय: आयज बायलांनी चूल आनी भुरगीं हाचे वांगडा हेर गजालींकूय वेळ दिवन स्वताची उदरगत करची. समाजीक संस्थांनी फुडाकार घेवन बायलांक चड करून गांवगिर्या वाठारांतल्या बायलांक माची उपलब्ध करून दिवपाची गरज आसा. बायल फुडें सरल्यार निश्चीतपणान तिच्या कुटुंबाचीय उदरगत जातली. खुबशे फावटी बायलांचेर घरांत अन्याय जाता. अन्याया आड बायलांनी पेटून उठचें अशें डॉ. विद्या गावडे हांणी म्हणलें.
गुळेली सत्तरी हांगच्या शांतादुर्गा महिला मंडळा वतीन कला आनी संस्कृती खात्याच्या सहकार्यान महिला उत्सव मनयलो. हे कार्यावळीचें उक्तावण डॉ. विद्या गावडे हांचे हस्तुकीं जालें. ह्या वेळार माचयेर लोककलाकार लाडू परवार, गुळेली पंचायतीचे सरपंच नितेश गावडे, गुळेली पंच अक्षिता अनिल गावडे, शांतादुर्गा महिला मंडळ अध्यक्ष पल्लवी गावडे आनी हेर मानेस्त हाजीर आशिल्ले.
लोककलाकार लाडू परवार हांणी लोककलेंतल्यान बायलांनी संस्कृताय राखून दवरची. हे दिकेन पावल उबारपाची गरज तांणी उक्तायली.
ह्या महिला उत्सवांत शांतादुर्गा महिला मंडळ, गुळेली सत्तरी, सरकारी माध्यमीक विद्यालय, गुळेली, श्री सांतेरी कालपुरुष कला आनी सांस्कृतीक मंडळ म्हाळशी कुर्टी, श्री दुर्गा महिला मंडळ वांते सत्तरी,
शांतादुर्गा महिला परीवर्तन मंडळ गुळेली,
ह्या मंडळांनी फुगडी, धालो, मुसळ नाच, कुणबी नाच, दिवली नाच, कळशी नाच आनी हेर तरेचे लोकनाच सादर केले.
हे पुराय कार्यावळीचें सुत्रसंचालन प्रसिद्धी प्रेमानंद नायक हांणी केलें. येवकार महिला मंडळ अध्यक्ष पल्लवी पांडुरंग गावडे हांणी दिलो. सगळ्यांचे उपकार उपाध्यक्ष विश्वजा विश्वराज सावंत हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
