भांगरभूंय | प्रतिनिधी
इंडियन प्रिमियर लिगेचे (आयपीएल) 54वे मॅचींत येजमान मुंबय इंडियन्सान रॉयल चॅलेंजर्स बंगळुरूक सहज रितीन 6 विकेटींनी हारयलो. बंगळुरून दिल्ली 200 धांवड्यांची मोख मुंबय इंडियन्सान 16.3 ओव्हरींनी 4 विकेटी वगडावन मेळयली.
एकेच ओव्हरींत दोनूय ओपनर तंबूंत परतून वचून लेगीत मुंबय इंडियन्सान विक्रमी 200 धांवड्यांचो येसस्वी रितीन फाटलाव केलो. इशान किशनान आक्रमक सुरवात करून दिली. पूण, रॉयल चॅलेंजर्स बंगळुरूच्या वनिंदू हसरंगान एकेच ओव्हरींत दोन धपके दिले. पूण, ते उपरांत सुर्यकुमार यादव आनी नेहल वढेरा हांणी चवके-सक्यांचो पावस घालून मुंबय इंडियन्साक सहज रितीन मॅच जिखून दिली. सुर्याक शेकडो उण्या फरकान चुकलो. पूण, ताणें नेहला वांगडा 66 बॉलांनी 140 धांवड्यांची म्हत्वाची भागिदारी केली.
ते आदीं मुंबय इंडियन्सान टॉस जिखून रॉयल चॅलेंजर्स बंगळुरूक पयलीं बॅटींग करपाचें आमंत्रण दिलें. पयलेच ओव्हरींत जेसन बेहरेनडॉर्फाचे बॉलिंगेचेर फाफ ड्युप्लेसिसाची कॅच नेहाल वढेरा कडल्यान सुटली. पूण, बेहरनडॉर्फाच्या बॉलाचेर विराट कोहली (1) मुखार येवन शॉर्ट मारपाचो यत्न केलो. पूण, बॉल बॅटाक लागून विकेटकीपर इशान किशाच्या हातांत गेलो. ते उपरांत अनुज रावत (6) कॅच बाद जालो. 16 धांवड्यांचेर दोन बॅट्समन तंबूंत परतून गेल्या उपरांत ग्लॅन मॅक्सवॅल आनी ड्युप्लेसीस हांणी तिसरे विकेटी खातीर ताबडतोड शेंकड्याची भागिदारी केली.
मुंबय इंडियन्सा वतीन पयलीच मॅच खेळपी क्रिस जॉर्डनाक दोन सके मारून मॅक्सवॅलान येवकार दिलो. मॅक्सवॅलान 25 बॉलांनी अंदूंच्या हंगामांतलो चवथो अर्द शेंकडो पुर्ण केलो. ड्युप्लेसिसान 30 बॉलांनी सवो अर्द शेंकडो पुर्ण केलो.
मॅक्सवॅल आनी ड्युप्लेसीस हांणी वानखेडे स्टेडियमाचेर सगले वटेन बॉलाक धांवडायलो. ही जोडी फोडपाक रोहित शर्मान 13वे ओव्हरींत जेसन बेहरनडॉर्फाक हाडलो. मॅक्सवॅलान ताका चवक्यान येवकार दिलो. तिसऱ्या बॉलाचेर मॅक्सवॅलान सको मारपाचो यत्न केलो. पूण, शिमे लागसार वढेरान ताची कॅच धरली.
मॅक्सवॅलान 33 बॉलांनी 8 चवके आनी चार सक्यांचे मजतीन 68 धांवड्यो केल्यो. तशेंच ड्युप्लेसिसा वांगडा 62 बॉलांनी 120 धांवड्याची भागिदारी केली. अंदूंच्या हंगामांत मॅक्सवॅल आनी ड्युप्लेसीस हांची ही चवथी अर्द शेंकड्याची भागिदारी आशिल्ली. तशेंच तांणी डॅव्हिड वॉर्नर आनी जॉनी बॅयरस्टो हांच्या विक्रमा कडेन बरोबरी केली. तांणी 2019त हो विक्रम केल्लो.
महिपाल लोम्रोराक (1) कुमार कार्तिकेयान बोल्ड केलो. 15वे ओव्हरींत बंगळुरूक व्हड धपको बसलो. कॅमरून ग्रीनाच्या बॉलाचेर ड्युप्लेसीस बाद जालो. ताणें 41 बॉलांनी पांच चवके आनी तीन सके मारून 65 धांवड्यो केल्यो.
इम्पॅक्ट प्लेयर म्हणून केदार जाधव मैदानांत देंवलो आनी पयल्चा बॉलाचेर चवको मारलो. अखेरेक 14 धांवड्यांचेर कार्तिकाची कॅच सुटली. ते उपरांत कार्तिकान आक्रमक बॅटींग केली. अखेरेक जॉर्डनान ताका बाद केलो. ताणें 19 बॉलांनी 30 धांवड्यो केल्यो. केदार 12 धांवड्यो करून नाबाद उरलो. वनिंदू हसरंगान 12 धांवड्यो करून बंगळुरूक 6 बाद 199 धांवड्यां मेरेन पावयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
