भांगरभूंय | प्रतिनिधी
ज्योती कुंकळ्येंकार: कृष्णदास श्यामा ग्रंथालयांत भुरग्यां खातीर आयोजीत गिमाळें शिबीर उमेदीन
पणजी: पणजे आदल्या काळार गरमेची आनी नाताळाची सुटी पडटकच भुरगीं मामाच्या घरा वतालीं. तेन्ना मामा-मामी, घरांतलीं ल्हान व्हडलीं, आजी आजो, सगळीं जाणां ह्या भुरग्यांक खूब गजाली शिकयतालीं. आयज काळ बदल्ला. मामाचो गांव आतां पयस जाला. कला आनी संस्कृती खात्यान आयोजीत केल्ल्या ह्या गिमाळ्या शिबिरान आयच्या काळांत मामाच्या गांवाची जागा घेतल्या. ही खूब आश्वासक आनी समाधानी करपा सारकी गजाल अशें मत साहित्यीक, चित्रपट निर्माती, दिग्दर्शिका, ज्योती कुंकळ्येंकार हांणी उक्तायलें.
कला आनी संस्कृती खात्या वतीन कृष्णदास श्यामा ग्रंथालयाच्या भुरग्यांच्या विभागांत समर विकचें आयोजन केल्लें. ह्या शिबिराचे उक्तावण कार्यावळीक ती उलयताली. ह्या वेळार कला आनी संस्कृती संचालनालयाचे संचालक सगूण वेळीप, ग्रंथालयाचे मुखेली सुशांत तांडेल, सहाय्यक राज्य ग्रंथपाल सुलक्षा कोळमुळे, भुरग्यांच्या विभागाच्यो प्रभारी मारिया डिसोझा, जादूगर प्रेमानंद पाटील, ग्रंथालयाचे अधिकारी, कर्मचारी हाजीर आशिल्ले.
सगूण वेळीप हांणी सध्याच्या काळांत मोबायल आनी टिव्हीपसून भुरग्यांक पयस करप कठीण जालां. अशा वेळार खात्यान आयोजीत केल्ल्या ह्या गिमाळ्या शिबिराक देडश्यां परस चड भुरग्यांनी वांटो घेवप ही समाधान करपा सारकी गजाल. वेळीप हांणी ह्या वेळर भुरग्यांक मार्गदर्शन केलें आनी अश्या शिबिरांचो दरेकल्यान लाव घेवचो अशें सांगलें.
सुशांत तांडेल हांणी भुरग्यांक मार्गदर्शन केलें. उक्तावण जातकच ज्योती कुंकळकार दिग्दर्शीत ‘गौरी’ हो बालचित्रपट दाखयलो. भुरग्यांनी व्हडा उमेदीन ‘गौरी’ चित्रपट पळयलो. ग्रंथालया वरवीं साहित्यिकां खातीर, वाचप्यां खातीर तशेंच भुरग्यां खातीर विवीध कार्यावळी आयोजीत केल्यात. भुरग्यां खातीर हें गिमाळें शिबीर आयोजीत केलां. हें शिबीर पांच ते बारा पिरायेच्या भुरग्यां खातीर आशिल्ल्यान 12 तारखे मेरेन चलतलें. जादूचे प्रयोग, बलून मोल्डींग, पेपर क्राफ्ट, शिंपले, पपेट मेकींग ह्या विशयांचेर भुरग्यांक मार्गदर्शन करतले अशें तांणी म्हणलें.
जादूगार प्रेमानंद पाटील हांणी भुरग्यांक जादूचे प्रयोग करून दाखयले. प्रिता परब हांणी सुत्रसंचालन केलें, जाल्यार सुलक्षा कोलमुळे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
