भांगरभूंय | प्रतिनिधी
भांगरभूंय। खबरां मेज
पणजीः गोंयांत रस्तो अपघत जावंन लोक मरतात ते फाटभूंयेर गोवाकॅना वतीन 15 तें 21 मे मजगतीं 7वें यूएन संवसारीक रस्तो सुरक्षा सप्तक मनयतले. वाहन चालकांक येरादारी नेमांक पाळो दिवपा विशीं ह्या सप्तकांत तरेकवार कार्यावळी आयोजीत करून लोक जाग्रुताय करतले.
गोवाकॅनान ह्या सप्तकाची सध्या तयारी चलयल्या. हें सप्तक गांवा, शार, तालुको आनी जिल्हो पांवड्यार मनयतले, अपघांतांत मरण आयल्याक कुटूंबाची कशी वाट लागता हें सत लोकांक ह्या वेळार सांगतलें. रस्तो सुरक्षे खातीर आपलें योगदान दिवपाची संद सरकारी आनी बिगर सरकारी संस्थांक मेळटली अशें गोवाक्रॅनाचो संयोजक रोलंड मार्टिन्स हांणे सांगलें.
येरादारी खातें, बांदकाम खातें, शिक्षण खातें, येरादारी पुलीस, पंचायत प्रशासन खातें, नगर उदरगत खातें, पर्यटन खातें आनी भलायकी खात्याक ह्या सुरक्षा सप्तका वरवीं रस्तो येरादारी नेमाचें शिक्षण दिवपाचें तशेंच अपघात जावचे न्हय हे खातीर घेवपाची उपाय येवजण करपाची संद मेळटली अशें ताणे सांगलें. पंचायत आनी पालिका पावंड्यार रस्तो सुरक्षा आनी येरादारी वेवस्थापन समिती स्थापन करपाची गरज मार्टिन्सान उक्तायल्या.
गोंय हें पर्यटन थळ आशिल्ल्यान पर्यटन वेवसायांत आशिल्ल्यानी रस्तो सुरक्षा सप्तकांचो लाब घेवंन गोंय हे सुरक्षीत आनी अपघात मुक्त पर्यटन थळ करपा खातीर वावुरपाची गरज आसा अशें ताणे सांगलें. रस्तो सुरक्षा सप्तका वेळार सांजें 7 तें सकाळी 7 मजगती येरादारी नेम पाळपाचे भर दितलें. जे कोण नेम मोडटात आनी वाहनां नेटान चलयतात ताचेंर कारवाय करतले अशी म्हायती मार्टिन्स हाणे दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
