भांगरभूंय | प्रतिनिधी
भांगरभूंय । प्रतिनिधी
पोरणे गोंयः मंडूर हांगा एके मालमत्तेंत आशिल्ली सुमार 72 झाडां मारून तांका उजो लावपाच्या प्रकरणांत राना खात्यान कंत्राटदाराक अटक करून तागेली मशिनरी जप्त केल्या. उजो लावपाच्या ह्या प्रकाराची सान्तआंद्रेचो आमदार विरेश बोरकार तशेंच आजोशीं- मंडूर पंचायतीचो सरपंच प्रशांत नायक हांणी दखल घेतल्या उपरांत चवकशेची चक्रां फिरलीं.
तीन दिसां आदीं व्हो उजो लायिल्लो. प्रा. रामराव वाघ हांणी ही गजाल सगल्यांत पयलीं उक्ताडार हाडल्ली. सोमाराक सरपंच प्रशान नायक हाणे घडणुकेचे सुवातेर वचून थंय आशिल्ल्या कामगारां कडेन चवकशी केली तेन्ना तांणी मारल्ल्या झाडांक उजो लायिल्ल्याचे मानून घेतलें. कुशीक आशिल्ले मालमत्तेंक आमी उजो लायलो ना. वाऱ्यान तो थंय पावला आसुए अशें तांणी सांगलें. नायक हाणे ह्या मालमत्तेचो धनी आशिल्ल्याचो दावो करपी मनश्या कडेन चवकशी करून उजो लावपाक कोणा कडल्यान परवानगी घेतली हें दाखोवपी कागदपत्रां घेवंन येवपाक ताका सांगलें. तो ती घेवंन येवपाक शकलो ना आनी आपले कडेन मालमत्तेचे मालकी हक्क आसात अशें तांणे सांगलें. आमदार विरेश बोरकार आयले उपरांत मात तो पळ्ळो.
मजगतीं राना खात्याच्या अधिकाऱ्यांनी उजो लायिल्ले सुवातेची पळोवणी केली. सुमार 20 हजार घनमीटराची 72 झाडां मारिल्ल्याचें तांकां दिसलें. हे सुवातेर आशिल्ल्या कंत्राटदारांक रानां अधिकाऱ्यांनी कामगारां सयत अटक करून ताचे वाहान आनी हेर मशिनरी जप्त करून निमाणे सोडली. एक सुपरव्हायजर आनी चार कामगारांनी राना खात्याच्या अधिकाऱ्यांक पळोवन फुज्जो काडल्यो.
उजो लावपाचो व्हो प्रकार मुद्दाक केला. झाडां मारून तांकां उजो लावन उपरांत हे सुवातेंत वेवसायीक प्रकल्प उबारपाचो हेत आसा अशें आमदार विरेश बोरकारान प्रसार माध्यमांक सांगलें. हे जमनीचेर बिल्डरांची नदर आसा. ते खातीर तांणी व्हो उजो मुद्दम लायला. जाणे व्हो उजो लायला ताचेर कारवाय करपाची मागणी बोरकारान केल्या. आपल्या मतदारसंघात असले प्रकार खपोवन घेवचो ना आनी उज्याचें हें प्रकरण उंचेल्या पांवड्यार आपूण व्हरतोलों अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
