भांगरभूंय | प्रतिनिधी
भांगरभूंय । प्रतिनिधी
काणकोणः आगोंद पंचायतीचे ग्रामसभेक आयिल्ल्या दरेका ग्रामस्थाक पंचायतीच्या कोयर विलो प्रकल्पांत तयार जाल्ले दोन किलो सेंद्रीय सारें दिलें. ह्या उपक्रमाक हाजीर आशिल्ल्यांनी येवकार दिलो.
सुरवेक ग्रामसभेंत वेगवेगळ्या उदरगतीच्या कामां विशीं चर्चा केली आनी कांय कामां हातांत घेवपा विशींचे थाराव पास केले. गटार, रस्ते तशेंच पारवें, मुडकूड,काराशीमळ हांगच्या रस्त्यांचें डांबरीकरण करपा खातीर मेळून आठ निविदा काडल्यात अशी म्हायती सरपंच फातिमा रॉड्रिग्ज हिणे ग्रामसभेक दिली.
पंचायत वाठारांत रस्त्यार फिरगी कुत्र्यांचो त्रास जाता अशी कागाळ कांय लोकांनी केली. धवलखाजन हांका दर्या देगेर पर्यटकांक ह्या कुत्र्यांचो चड त्रास जाता अशें तांणी सांगलें. हातूंत लक्ष घालपाचें उतर सरपंचान दिले. पंचायतीन कोयराचो प्रश्न हाताळपा खातीर पावलां घातल्यांत. ओल्या कोयराचेर प्रक्रिया करपा खातीर प्रकल्प सुरू केला अशें पंचायत सचीव अमोल नायक गावणेकारान सांगलें. सरकारी प्रकल्पात कोयराचो विलो लागपाक पंदरा दीस लागतात. ताका लागून पंचायतीन एका खाजगी प्रकल्पांत एका दिसांत कोयराचो विलो लागता ते खातीर तांचे कडेन काम दिलां अशें ताणे सांगलें.
पंचायती कडेन सध्या एक टन सेंद्रीय सारें आसा आनी 22 मेच्यान तें लोकांक सवाय दरान विकतें दितले. पंचायतीन कोयर एकठांय करपा खातीर खासा कामगार नेमल्यात अशें ताणे सांगलें. उपरांत ग्रामसभेक आयिल्ल्यान दोन किलो सारें फुकट दिलें. रामनाथ वेळीप आनी नीलेश पागी हे पंच वांगडी ग्रामसभेक हाजीर नाशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
