भांगरभूंय | प्रतिनिधी
भांगरभूंय । प्रतिनिधी
पोरणे गोंयः मेरशे पंचायतीचे आयतारा जाल्ले ग्रामसभेंत पंचायत वाठारांत भाड्यान दिल्ल्या कुडींचें सर्वेक्षण करपा खातीर एक समिती स्थापन करपाचो निर्णय घेतलो. जांणी भाड्यान कुड्यो दिल्ल्यात ताचे कडल्यान एक म्हयन्यांचें भाडें पंचायतीक मेळचें हें खातीर सर्वेक्षण करपा खातीर समिती नेमपाची मागणी ग्रामसभेंत हाजीर आशिल्ल्यांनी केल्ली.
पंचायतीची येणावळ वाडोवपा खातीर जे कोण भाड्यान रावतात तांचे कडल्यान कोयर शुल्क वसूल करपाची सूचोवणी ग्रामस्थांनी केली. भाड्या कुडींचे सर्वेक्षण करपा खातीर जी समिती आसतली ताचेर पंचायतीच्या 11 वॉर्डांतल्या पंचानी आपापले प्रतिनिधी वेचून धाडचे अशें थारलें. पंचाक तांच्या प्रतिनिधींचीं नांवा पंदरा दिसा भितर दिवपाक सांगलां. समितीचेर सगळे पंच वांगडी आसतले अशें सरपंच एसीस फर्नांडीस हाणे सांगलें. पुलीस स्टेशनांत नांवां नोंद करनास्ता जे कोण भाड्यान रावताक तांको सोदून काडपाचें काम हे समितीन करचें अशें लोकांनी सांगलें.
मेरशी पंचायत वाठारांत समाज सभाघर बांदपा खातीर सान्ताक्रुजाचो आमदार रुदोल्फ फर्नांडीस हाणे एक सुवात सोदून काडल्या. पंचायत मंडळाक पत्र धाडून ते संबंदी थाराव पास करपाक ताणे सांगलां अशी म्हायती सरपंचान सभेंत दिली. पंचायत घर, भलायकी केंद्र आनी हेर सुविधा मेळच्यो हे खातीर आमी थाराव पास करतले अशें सरपंचान सांगलें.
ग्रामसभेंत घाणयाऱें उदक गटारांत सोडपा विशीं चर्चा जाली. जे कोण गटारांत आपलें घाणयारें उदक सोडटात तांचेर पंचायत मंडळान आपूण जावंन कारवाय करची अशें कांय ग्रामस्थांनी सांगलें. जे कोण अशें उदक सोडटात ताचीं नांवा पंचायत मंडळान भलायकी अधिकाऱ्यां कडेन दिल्यात. ताचें नळ आनी लायटी कनेक्शनां तोडपाचो अधिकार त्या अधिकाऱ्यांक आसा अशें सरपंचान लोकांक सांगलें. सरकारान कोयर शुल्ल दर वर्साक 900 रुपया करचें अशी सूचोवणी केल्या. ताचेर ग्रामसभेंत चर्चा जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
