भांगरभूंय | प्रतिनिधी
सिद्धी आरोलकार: हरमल बालभवनची गुणदर्शन कार्यावळ उमेदीन
हरमल: हालींच्या काळांत शिक्षणीक पात्रताय आसल्या बगर खंयचेच मळ तुका खुणायना. पूण विद्यार्थी आसतनाच खंयचीय कला आत्मसात केल्यार ताचो नकळटां जिणेंत उपेग जाता. ताका लागून पालकांनी शिटूक रावन भुरग्यांच्या कला गुणांक उर्बा दिवची अशें मत समाजकार्यकर्ती अॅड. सिद्धी जित आरोलकार हांणी उक्तायलें.
बालभवन केंद्र, हरमल हांच्या वर्सकी गुणदर्शन कार्यावळींत मुखेल सोयरी म्हणून अॅड. अरोलकार उलयताली. ही कार्यावळ भौशीक गणेशोत्सव मंफळाच्या सभाघरांत जाली. बालभवनाचें काम तोखणाय करपा सारकें आशिल्ल्यान बालकांक अभ्यासा वांगडा कलेंतूय फिशाल करप गरजेचें. दरेका विद्यार्थ्या मदीं बरेच गूण आसतात. ह्या सभाघरांत विध्यार्थ्यांनी तयार केल्लें हस्तशिल्प आनी हेर साहित्य मनाक उर्बा दिवपी आसा, अशें आमदार जित आरोलकार हांचे घरकान्न अॅड. सिद्धी आरोलकार हांणी म्हणलें.
बालभवनांत गिमाळे सुटयेंत वा हेर दिसांनी भुरग्यांक जें कितें शिकयता त्या उपक्रमांची
तोखणाय पालकांनी करची. तशेंच चित्रप्रदर्शन लोकांक जावचें, तशेंच पालक-शिक्षका मदलें संवाद नातें घटमूट जावचें होच हाचे फाटलो हेत अशें बालभवनाचे लेखा अधिकारी लक्ष्मीदास मणेरीकार हांणी म्हणलें.
ह्या वेळार माचयेर पंच सोनाली माज्जी, अनुपमा मयेंकार, पालयेंचे पंच सागर तिळवे, पत्रकार चंद्रहास दाभोलकार आनी बालभवन केंद्र मुखेली गंगाराम परब हाजीर आशिल्ले.
ह्या वेळार तिळवे हांणी बालभवन सरकारी शाळा इमारतींत चालू आशिल्ल्यान ही इमारत धोको निर्माण करता. ताची दुरुस्ती करपाची मागणी तांणी केली.
सुरवातेक अॅड. सिद्धी आरोलकार हांचे हस्तुकीं दिवली पेटोवन कार्यावळ सुरू जाली. उपरांत भुरग्यांच्या चित्रप्रदर्शनाची तिणें पळोवणी केली. विद्यार्थ्यांनी येवकार गीत सादर केलें. उपरांत भुरग्यांनी सांस्कृतीक आनी मनरिजवणेच्यो कार्यावळी सादर केल्यो.
बालभवनाचे शिक्षक चंद्रोजी नायक, अनुजा साळगांवकार, अनुजा नायक, सिताराम पेडणेंकार, समिक्षा पेडणेंकार आनी अंकूश नायक हांणी ही कार्यावळ येसस्वी जावपाक मेहनत घेतली. ह्या वेळार पालक व्हडा संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
