भांगरभूंय | प्रतिनिधी
लखनौक 56 धांवड्यांनी हारयलो
खबरां संस्था I अहमदाबाद
अहमदाबादच्या नरेंद्र मोदी स्टेडियमाचेर अायपीएल 2023 तली 51वी मॅच जाली. ही मॅच लखनौ सुपरजायंट्स आनी गुजरात टायटन्स पंगड हांचे मदीं जाली. हें मॅचींत गुजरातान लखनौचेर 56 धांवड्यांनी जैत मेळयले. गुजरात पंगडान पयली बॅटींग करतना 20 ओवरींनी 2 बाद 227 धांवड्यो केल्यो. प्रत्युत्तरांत लखनौ पंगड 20 ओवरींनी 7 बाद 171 धांवड्यो करपाक
शकलो. गुजरातच्या जैतांत साहा, गील आनी मोहीत शर्मा हांणी पर्जळीत कामगिरी केली.
गुजरात टायटन्स पंगडाच्या 228 धांवड्यांचो फाटलाव करतना मैदानांत देंविल्ल्या लखनौ सुपरजायंट्स पंगडान बरी सुरवात केली. ओपनर कायल मेयर्स आनी क्विंटन डीकॉक हांणी पयले विकेटी खातीर 8.2 ओवरींनी 88 धांवड्यांची भागिदारी केली. कायल मेयर्सान 32 बॉलांनी 7 चवके आनी 2 सक्यांच्या मजतीन 48 धांवड्यांची खेळी करून तो बाद जालो. ताचो फक्त दोन धांवड्यांनी अर्दशेंकडो चुकलो.
क्विंटन डीकॉक आनी कायल मयर्स हांचो आडवाद वगळ्ळ्यार एकाय बॅट्समनाक फावोशी खेळी करपाक जमले ना. एकाय बॅट्समनाक 30 धांवड्यो करप शक्य जाले ना. दिपक हुड्डा 11, मार्कस स्टॉयनीस 4, निकोल पूरन 3, आयुष बडोनी 21 धांवड्यांचेर बाद जाले. मुखेली कृणाल पांड्याक खातेय उगडपाक जमले ना.
हें मॅचींत टॉस जिखून लखनौ सुपरजायंट्स पंगडान पयली बॉलींग करपाचो निर्णय घेतलो. गुजरात खातीर हे मॅचींत ऋद्धिमान साहा आनी शुभमन गील ही सलामी जोडयेन वेगान धांवड्यो काडपाक सुरवात केली. ताका शुभमन गील हांणी बरो सांगात दिलो.
ऋद्धिमान साहान फकत 20 बॉलांनी अर्दशेंकडो पुराय केल्ल्यान गुजरातची धांवसंख्या पयल्या 6 ओवरींनी 78 धांवड्यां मेरेन
पावयली.
गुजरातच्या बॉलरांनी उत्कृश्ठ बॉलींग केली. सुरवातीक गुजरातच्या बॉलरांक लय मेळूंक ना. लखनौच्या सलामी जोडयेन गुजरातची बॉलींग फोडून काडिल्ली. पूण ही जोडी फुटले उपरांत गुजरातच्या गोलंदाजांनी अचूक टप्प्याचेर बॉलींग केली. ताका लागून थारावीक अंतराचेर विकेटी घेतल्यो.
मोहीत शर्मान सगल्यांत चड 4 विकेटी घेतल्यो. मोहीत शर्मान चार अोवरींनी फकत 29 धांवड्यो दिल्यो. नूर अहमद, राशीद खान अानी मोहम्मद शमी हांणी दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
