भांगरभूंय | प्रतिनिधी
फाटल्या लेखान आमी दोतोर विजय बोर्जिस हांणी स्टार्ट अपाक वेग येवचो म्हूण गोंयांतलो पयलो इन्क्युबेशन केंद्र दिलें, तें स्टार्ट अप सुरु करपाक तुमी उत्सुक आसतले. आयज गोंयां भितर कितलेशे स्टार्ट अप सुरु जाल्यात आनी ताका यश लेगीत मेळ्ळां. तुमचे भितर कांय गुण आसपाक जाय, ते नासत तर आता सावनूच विकसित करात. सुवात तर आसुकूच जाय, पूण तुमची कल्पना बाजारान स्वीकारपाक जाय. स्टार्ट अप सुरु करपाक धाडस नक्कीच जाय, पूण तें करचे पयलीं आपणें ताची म्हायती काडप/ घेवप चड महत्वाचें. ही म्हायती घेतले उपरांत तुमची जी कितें कल्पना आसा ती घेवन तुमी लागीच्या इन्क्युबेशन केंद्रान वचून थंयच्या अधिकाऱ्यां कडेन भासाभास करपाक जाय. ते तातून तुमचे लागीं कितें आसा? कितें जाय? हाची वेवस्थित म्हायती दितले. तुमीं सिबा, वेर्णा नाजाल्यार फोर्स फातोर्डा कॉलेज वचूं शकतात.
हे बाबतीन अभियांत्रिकी काॅलेजीचे आदले विद्यार्थी आनी सिबा गायगी कंपनीचे आदले वेवस्थापक, राष्ट्रीय पुरस्कार फाव जाल्ल्या युवा पणजेचे संस्थापक रघुवीर महाले हांचे कडेन भासाभास केली. तांणी सांगलें, गोयच्या विद्यार्थ्यां मदी हुशारी आसा, उमेदय आसा, पूण तांकां फाव ते मार्गदर्शन योग्य वेळार मेळना. वेवसायिक कॉलेजांनी जशी इन्क्युबेशनची वेवस्था आसा तशी हेर कॉलेजांनी लेगीत आसपाक जाय आनी हाचेच वांगडां उद्देजक जावपा खातीर कितें? गरजेचे तशेच कशा पद्दतीन वचपाचें हें लेगीत खबर आसूंक जाय. म्हाका दिसता हे अभ्यासक्रमांत आसप गरजेचें. वेवसायिक फाट्यान हालीं ताचो आस्पाव केल्लो दिसता. महाले सांगतात की गोंयां भितर स्टार्ट अपाक फाव ते प्रोत्साहन सरकार दिता. मनोहर भाई पर्रीकर हांचो ते जाणविकायेन उल्लेख करतात. ते आसतना CMRV हाची सुरवात केल्ली. हे येवजणी खाला स्टार्ट अप करतल्याक चार लाख रीण रूपान दिवपाची वेवस्था आशिल्ली, जी फुडें 20 लाखां मेरेन व्हेली, जाचो लाव खूबश्या जाणांनी घेतलो. खेरीज घेतिल्लें रीण लेगीत 85% घेणाऱ्यांनी परत केलें. कोंटरेकटझी- गौतमी रायकार, कोपरकोड्सचे चिन्मय कामत, इन्व्हेन्टरोमचे प्रणव पै वेर्णेकार हीं तांची खाशेलीं उदाहरणां.
स्टार्ट अपच्या येवजणी सकयल सुरु केल्ले हे प्रकल्प बरे पद्दतीन चलतात. चडशा जाणाक तांच्या वेवसायांत सुरवेक त्रास जाले खरे, पूण आपुण दुसऱ्याक रोजगार दिता, हें समाधान प्रोत्साहन दितालें. हें तांचें काम तोखणाय करीसारकें आसा. कित्याक तर ते फक्त रोजगारच दिनात तर राज्याच्या विकासाक तांचो हातभार आसा, हें आमी विसरूंक जायना. नोकरी मेळपाक खूब कठीण जालां, पूण तुमचे लागीं जर बरी कल्पना आसत तर तुमी ती घेवन सिबा, वेर्णा नाजाल्यार फायर ह्या फातोर्डा कॉलेजान आसपी इन्क्युबेटर केंद्रान वचू येता. तुमच्या कल्पनेचेर थंयचे अधिकारी विचार करतले. तातूंतल्यो शंका पयस करतले. तुमकां जर पयशांची अडचण आसत तर ही कल्पना फिजिबल आसपाक जाय, ही जतनाय तुमी घेवपाक जाय. तेच तुमकां पयशांची वाट दाखयतले. एन्जल गुंतवणूक, ई डी सी, मुख्यमंत्री रोजगार येवजण, डी टी डी सी प्रधानमंत्री रोजगार येवजण ह्या सारख्या येवजणींची म्हायती आसप गरजेचें. तुमी जेन्ना नोकरी करतात, तेन्ना तुमी कोणा खातीर तरी त्रास काडटात. स्टार्ट अपा भितर तुमी जरूर त्रास घेतले, पूण ते तुमच्या खातीर आसतले हें विसरूंक जायना. स्टार्ट अप सारखी येवजण बरी आसा, पूण तुमची कल्पना बरी आसपाक जाय. खेरीज ती परवडा सारखी आसपाक जाय. ह्या मळाचेर तुमचे निरीक्षण आनी वाचन तशेच उद्योजकां कडेन संवाद सादत जाल्यार खंयच्या गजालींचेर तुमी लक्ष दिवपाचें हाचेर मार्गदर्शन तुमकां मेळूं शकता. तशेच ह्या वावरा भितर जाका येश मेळ्ळां, जांचें नांव जालां तांकां तुमी मुजरत मेळात. हातूंतल्यान तुमकां तुमची वाट मेळू
शकता. वांगडा ह्या विशया वेले वाचनूय गरजेचें आसा.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
