भांगरभूंय | प्रतिनिधी
डॉ. देविया राणे: रॉयल खेळां आनी सांस्कृतीक मंडळाचो वर्धापन दीस उमेदीन
पणजी: गांवचे उदरगती खातीर समाजीक संस्थांची गरज आसा. विद्यार्थ्यांनी शिक्षणांत लक्ष घालचें. तशेंच शिक्षणीक उपक्रमां वरवीं विद्यार्थ्यांनी आपली उदरगत करची, अशें पर्यें मतदार संघाची आमदार तशेंच गोंय वनविकास म्हामंडळाची अध्यक्ष डॉ. देविया विश्वजीत राणे हांणी म्हणलें.
केरी, भायलोवाडो हांगच्या रॉयल खेळां आनी सांस्कृतीक मंडळाचो 23वो वर्धापन दीस श्री हनुमान मंदिराच्या आंगणांत उमेदीन मनयलो. हे कार्यावळीक मुखेल सोयरी म्हणून आमदार राणे उलयताली. ह्या वेळार माचयेर अबकारी आयुक्त नारायण गाड, गोंय पर्यटन विकास म्हामंडळाचे उपवेवस्थापक तशेंच श्री हनुमान मंदिराचे अध्यक्ष दिपक नार्वेंकार, जिल्हो पंचायत वांगडी देवयानी गांवस, केरीची सरपंच दिक्षा गांवस, क्लबाचे अध्यक्ष गिरीश गांवस, सगळे पंच वांगडी आनी हेर मानेस्त हाजीर आशिल्ले.
नारायण गाड हांणी भुरग्यांक मार्गदर्शन करतना नव्यो संदी सोदपाचो उलो मारलो. परिक्षांनी येस मेळोवपा खातीर बरे तरेन तयारी करची. तशेंच संवाद कुशळटायेचेर भर दिवची, अशें तांणी सांगलें.
दिपक नार्वेंकार हांणी शिक्षणीक करियरा विशीं उलयतना भुरग्यांनी नव्या शिक्षणीक प्रवाहांत आस्पाव घेवचें. भुरग्यांनी आतांच शिक्षणांतल्या नव्या मळांची निवड केल्यार तांचो फुडार पर्जळटलो अशें तांणी सांगलें.
ह्या वेळार क्लबाचे अध्यक्ष गिरीश गांवस, सरपंच दिक्षा गांवस हांणी विचार उक्तायले. सुत्रसंचालन गजानन शेट्ये हांणी केलें आनी तांणीच उपकार मानले.
ह्या वेळार आमदार डॉ. देविया राणे हांकां मानचिन्न भेटयलें. तशेंच विवीध सर्तींतल्या जैतिवंत विद्यार्थ्यांक ह्या वेळार मानेस्तां हस्तुकीं इनामां भेटयलीं. उपरांत भुरग्यांच्यो सांस्कृतीक कार्यावळी जाल्यो. तशेंच सांजेवेळार थळाव्या तरणाट्यां वतीन दशावतारी नाटक सादर केलें. ह्या वेळार व्हडा संख्येन नाट्य मोगी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
