भांगरभूंय | प्रतिनिधी
दर एकल्या मनशाचे जिवनांत एक सपन आसता. तें खरें जावचें देखून मनीस खूब यत्न करतां. ताचे खातीर देवाक नमन करून मागणें मागता. तशेंच गांवगिर्या वाठारांत रावपी लोकां मजगतीं कांय सपनां आसतात. आपल्या गांवची उदरगत जावची, फावो त्यो सोयी मेळच्यो आनी गांवांतल्या लोकांनी तरेकवार मळांचेर नामना जोडची.
आमचो वाठार तसो गांवगिरो. पुर्तुगेजाच्या वेळार लोक चलत फिरताले. कुळागरां-शेतां मदल्यान आनी दोंगरांतल्यान वळणां घेयत मुखार वचपी वाटांनी लोक चलत वताले. गांवांतल्यान दिवचले वतलो जाल्यार 2 किलो मिटर चलत वचपाक अर्दो तास वतालो. सुमनाच्या बाजाराक दिवचले वचून संवसाराक लागपी सामान पिशव्यांनी भरून हातांत ना जाल्यार फाटीर मारून हाडचें पडटालें.
आमच्या वाठादेव गांवांत सगळे सण परबो लोक मनयतालो. गणेश चतुर्थी, म्हळ्यार चवथ, दिवाळी, पाडवो, शिगमो हांचो सणा परबेंत आसपाव आसलो. लोकांक एकठांय येतले जाल्यार भौशीक स्वाद नासली. गांवांत एक व्हडलें ‘तळप’ वाटे लागसार कांय घरां मुखार आसलें. लोक जमपाचे जाले की तळपेर जमताले.
गांवांत एकूय देवूळ नासलें. गांवचो म्हळ्यार वाठाराचो देव स्वयंभू लिंगाच्या रुपांत न्हंयच्या पलतडचे देगेर आसले. गरमेच्या दिसांनी ग्रामदेवाचे दर्शन लोकांक जाताले. सगळे लागसारचे गांवांतले लोक ‘वांठादेव’ ह्या नांवान ग्रामदेवाक आनी गांवाक वळखताले.
जाणटे सांगता त्या गजालीं वयल्यान वाठादेव गांवांत गोरवांचो रोग येवन बरींच गोरवां (गायी, म्हशी, बैल, वासरां) मेलीं. साथीचो रोग वाडुंकूच लागलो. तेन्ना गांवच्या लोकांनी कुळागर, शेतकामती तशेंच हेरांनी देवाक गाराणें घातलें आनी रोग पयस जावचो अशें मागणें करून श्री सत्यनारायणाची पुजा आंगयली. तेन्ना सावन ही पुजा न्हंय लागसार कांय वर्सां जाणट्यांनी सादो चुडटां मेडीचो माटोव घालून दर वर्सा केली. लोकांक ल्हान देवळी बांदपा खातीर देवाचो कौल जावंक ना. ‘एके रातीन आनी एके वातीन’ जाल्यार देवळी बांदात असो कौल जालो. तो कोण कसो पुराय करूंक शकता?
हे गजालीक सुमार शंबर वर्सां जावन गेलीं. 1980 वर्सा गांवच्या कांय तरणाट्यांनी एकठांय येवन लोकांच्या पालवान ल्हानशी देवळी बांदली. पूण लिंगाची स्थापना न्हय कांयच करूंक ना. देवीचो फोटो दवरलो. दर शेनवारा गांवचे गायक कलाकार भजनाची कार्यावळ करताले. अशीं बरींच वर्सां गेलीं.
गोंयांत यत्न करुनूय नोकरी मेळूंक ना देखून संस्कृत भाशेंत ‘काव्यतीर्थ’ पदवी घेतिल्लो गांवचो पूत देविदास लाडू उमर्ये मुंबयक गेलो. थंय पयलीं कांय वर्सां पुरोहितपण आनी मागीर मुंबयच्या नामनेच्या महालक्ष्मी देवळांत पुजारी म्हणून ताणें सुमार 25 वर्सां नोकरी केली. मागीर तो आपल्या आदल्या गांवांत वाठादेव हांगासर आयलो. आमच्या गांवांत देवूळ ना, ती गरज पुराय करपाचो विचार ताच्या मनांत बरींच वर्सां घोळटालो. ताणें गांवच्या कांय तरणाट्यांक एकठांय करोन देवळाची कल्पना तांचे मुखार मांडली आनीक 2003 ह्या वर्सा ‘श्री वाठादेव मंदिर जिर्णोध्दार समिती’ ह्या नांवान समितीची स्थापना केली गांवांतल्या दर एकाच्या घराक 500 रुपयांची वर्गणी काडली. सुमार 40 हजार निधी एकठांय जालो. पूण तो देवूळ बांदपाची सुरवात करपाक खुबूच उणो आसलो.
2005 ह्या वर्सा देविदास लाडू उमर्ये हांणी म्हजी भेट घेवन हांवें ते समितीक सक्रीय सदस्य म्हूण वांटो घेवचो असो आग्रह केलो. तांच्या उतराक मान दिवन आनी गांवांत देवूळ जावप ही व्हडली गरज आसा हे मतींत घेवन हांवें हयकार दिलो.
आमच्या कुटुंबान देवळाचे गर्भकुडीचो खर्च आनी मुखेल कळस दिवपाची तयारी पर्गटायली. वळखीचे उद्योगपती, व्यापारी, नोकरदार, शिक्षक तशेंच हेरां कडेन देवळा खातीर देणगी दिवपाची विनंती केली ताका बेसबरो पालव मेळ्ळो. गांवच्या सगळ्या कुटुंबांनी श्रमदान, अर्थीक मदत, देणग्यो तशेंच मनाकाळजा सावन देवूळ बांदपाचो संकल्प तडीक व्हरपाक हर तरेचें ‘योगदान’ दिलें. आनीक ‘देवाची कृपा जाली’. आनी लोकांची इत्सा दोन वर्सां भितरूच पुराय जाली. हो एक व्हड दैवी योगायोग आसलो.
शिवलिंग आनीक नंदीची पाशाणी मुर्ती सदाशिवगडा सावन अशोक मडकयकार हांणी तयार केल्ल्यो. तशेंच पितळेचो ओतीव व्हडलो कळस दीस रात काम करून देवाच्या प्रतिश्ठापनेच्या दिसा तयार करपाचें व्हडलें काम केलें.
वाठादेव हो न्हंयंत स्वयंभू आसा. ताची कोणूच प्रतिश्ठापना करूंक शकना. पूण न्हंयक गीम-पावस खूब उदक (बाराय म्हयने) आसता देखून लोकांक पुजा वा सेवा करूंक मेळना. हे फाटभुंयेर त्या स्वयंभू देवाच्या रुपांत देवळांत शिवलिंग आनी नंदीची प्रतिश्ठापना करपाचो ‘भांगराळो दीस’ माघ कृष्ण फेब्रुवारी 2007 ह्या वर्सा आयलो.
करवीर पीठाधीश श्रीमद जगतगुरू शंकराचार्य नृसिंह विद्या भारती स्वामीजीचे हस्तुकीं कलशारोहण आनीक प्रतिश्ठापना जाली. तीन दिसांची कार्यावळ जाली. ह्या निमतान स्वामीजींची पाद्यपुजा करून मागीर तांचें आशीर्वचन जालें. दुसरे दीस वर्सुकी श्री सत्यनारायण महापुजा जाली. तिनूय दीस लोकांनी श्रीवाठादेवाचो कृपाप्रसादचो आनी महाप्रसादाचो लाव मेळ्ळो. हजारांनी भक्तभावीक आनी वाठादेव गांवच्या लोकांनी लागसारच्या वाठारांतल्या भक्तांनी ह्या सुवाळ्याक हजेरी लायली. हो दीस पळोवपाचें भाग्य जाणटे, तरणाटे आनी भुरगीं अश्या तिनूय पिळगेच्या मनशांक मेळ्ळें.
फुडें चालू….
रमेश सावयकार
9637748974
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
