भांगरभूंय | प्रतिनिधी
चेन्नय सुपरकिंग्सान चेपॉकाचेर मुंबय इंडियन्सा आड 6 विकेटींनी झणझणीत जैत जोडलें. चेन्नय सुपरकिंग्साच्या बॉलरांनी बरी बॉलींग घालून मुंबय इंडियन्साक 9 बाद 138 धांवड्यां मेरेन मजल मारपाक दिली. मथिशा पथिराणा, तुषार देशपांडे आनी दीपक चहर हांणी उत्कृश्ट प्रदर्शन केलें. मुंबय इंडियन्सा वतीन 23 वर्सां पिरायेचो नेहाल वढेरान एकल्यानूच प्रतिस्पर्धी पंगडाच्या बॉलरांचो खर प्रतिकार केलो. ताणें 61 धांवड्यो केल्यो.
ल्हान मोखीचो फाटलाव करतना चेन्नय सुपरकिंग्साच्या बॅट्समनांनी लेगीत बरें प्रदर्शन केलें. ताणें 17.4 ओव्हरींनी 4 विकेटी वगडावन 140 धांवड्यो करून जैत जोडलें. ह्या जैतान चेन्नय सुपरकिंग्सान 13 गुणां सयत दुसरे सुवातेर उडी घेतली. हे हारी उपरांत लेगीत मुंबय इंडियन्साचें प्ले ऑफांत सुवात मेळोवपाचें आव्हान कायम आसलें तरी ताचो मार्ग आतां कठीण जालां.
चेन्नय सुपरकिंग्साच्या बॉलरांनी पावर प्लेयांतूच मुंबय इंडियन्साची आघाडीची फळी खिळखिळी करून उडयली. कॅमेरून ग्रीन, इशान किशन आनी रोहित शर्मा हे बॅट्समन फकत 14 धांवड्यां भितर तंबूंत परतून गेले. चेन्नय सुपरकिंग्सान मॅचीचेर मेळयिल्ली पकड नेहाल वढेरान धील केली आनी मुंबय इंडियन्साक लजेक पडपा पसून वाटायलो.
नेहाल आनी सुर्यकुमार यादव (26) हांणी 55 धांवड्यांची भागिदारी केली. वढेरा 51 बॉलांनी 8 चवके आनी एका सक्याचे मजतीन 64 धांवड्यो करून बाद जालो. मथिशा पथिराणान 16 धांवड्यांनी 3 विकेटी घेतल्यो. तुषारान 26 धांवड्यांनी 2 विकेटी घेतल्यो.
ल्हान मोखीचो फाटलाव करपी चेन्नय सुपरकिंग्साक ऋतुराज गायकवाड आनी डेव्हॉन कॉन्वे हांणी बरी सुरवात करून दिली. दोगांयनी 4.1 ओव्हरींनी 46 धांवड्यो केल्यो. तातूंतल्यो 30 धांवड्यो ऋतुराजाच्यो आशिल्ल्यो. पियुष चावलान ताच्या पयल्या बॉलाचेर ऋतुराजाक बाद केलो. कॉन्वेक दुसरे विकेटी खातीर अजिंक्य रहाणेची साथ मेळ्ळी. पूण, पियुषान परतून एकदा भागिदारी फोडली. अजिंक्य 21 धांवड्यो करून एलबीडब्ल्यू बाद जालो. पियुषान 25 धांवड्यांनी 2 विकेटी घेतल्यो.
इम्पॅक्ट प्लेयर म्हणून आयिल्ल्या अंबाती रायुडून 12 धांवड्यो केल्यो. ताका स्तब्सान बाद केलो. शिवम दुबे आयलो आनी दोन सके मारून चेन्नय वयले चेपण हलकें केलें. जैता खातीर 10 धांवड्यांची गरज आसतना आकाश माधवालान चेन्नयची म्हत्वाची विकेट घेतली. कॉन्वे 44 धांवड्यो करून एलबीडब्ल्यू बाद जालो. मॅच फिनीश करपाक मुखेली महेंद्रसिंग धोनी मैदानांत आयलो. त्या वेळार चेपॉकाचेर प्रेक्षकांनी जल्लोश केलो. धोनीन एक धांवडी घेवन चेन्नयचें जैत निश्चीत केलें. शिवम दुबे 18 बॉलांनी 26 धांवड्यो करून नाबाद उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
