भांगरभूंय | प्रतिनिधी
तारा केरकारः बायलां सयत रस्त्याचेर देंवपाची शिटकावणी
भांगरभूंय । प्रतिनिधी
पेडणें: मनोहर आंतरराष्ट्रीय विमानतळाचेर हक्काचो टॅक्सी स्टॅण्ड मेळचो हे खातीर पिडेस्त शेतकार आनी पेडणें म्हालांतले टॅक्सी वेवसायीक आंदेलन करतात. तांचे मागणेची दखल घेवन सरकारान जर तांकां येलो ब्लॅक टॅक्सी स्टॅण्ण मेळोवन दिलो ना जाल्यार आपूण आनी गोंयच्यो साबार बायलो आंदोलकां वांगडा रस्त्याचेर देंवतली, अशी शिटकावणी समाज वावुरपी तारा केरकार हांणी दिली. सरकारी संकुला मुखार आंदोलन करपी टॅक्सी वेवसायिकांक तेंको उक्तायतना ती उलयताली.
हक्काचो टॅक्सी स्टॅण्ड मेळचो हे खातीर जानेवारी सावन टॅक्सी वेवसायीक वेगवेगळ्या माध्यमांतल्यान आंदोलन करतात. सरकारान तांकां आस्वासनां बगर आनीक कांयच दिवंक ना. उरफाटे आंदोलम बंद उडोवचे खातीर सुकें कुळण ते मोपा आंतरराष्ट्रीय विमानतळा मेरेन 144 कलन लावन जमाव करपाक बंदी घातल्यो. आमच्या हक्का खातीर वेळ आयल्यार तें कलमूय आमी मोडटले. सरकाराक जर आमची सोंशिकसाण आनी मानसिकता पळोवची ना जाल्यार ताकतिकेन मागणी मान्य करची, अशें आंदोलकांचें म्हणणें आसा. जमाव करचो न्हय हे खातीर सरकारान 144 कलम लायलां. तरी लेगीत वेगवेगळ्या माध्यमांतल्यान साबार समाजीक आनी राजकी पक्षाचे फुडारी, तशेंच कार्यकर्ते आंदोलन करप्यांक तेंको दितात. ह्या तेंक्याच्या बळार आमी सरकाराक शिटकावणी दितात, जर दिल्ले मुजतींत सरकारान येलो ब्लॅक टॅक्सी स्टॅण्ड उपलब्ध करून दिलो ना जाल्यार आंदोलन करपी रस्त्याचेर देंवतले. उपरांत जर कितें वायट प्रकार घडलो जाल्यार ताका पुराय जापसालदार सरकार आसतलें, अशें अॅड. जितेंद्र गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
