भांगरभूंय | प्रतिनिधी
घडणुकेचे सुवातेचेर उजो पालोवपी दळाच्या अधिकाऱ्यां सयत बंब तैनात
भांगरभूंय । प्रतिनिधी
फोंडें: शुक्रारा ढवळे कावला अड्ड्याक लागिल्लो उजो अजून पेट्टा. उजो पालोवपी दळाचे जवान शुक्रारा सावन घडणुकेचे सुवातेचेर लक्ष दवरून आसात. शेनवारा सकाळ सावन रातीं उसरां मेरेन उजो पालोवपाचे यत्न चालू आशिल्ले. ते खातीर खाशेलें जेसीबी मशीन तशेंच उदकाचे टँकर उपलब्ध करून दिल्यात. उज्यांत लाखांनी रुपयांचें लुकसाण जाल्ल्याचो अदमास आसा. बेकायदो चालू आशिल्ले कावला अड्डे सासणाचे बंद करपाची मागणी थळाव्या लोकांनी लावन धरल्या.
ढवळे शुक्रारा दनपारां 12.30 वरांच्या सुमाराक कावला अड्ड्याक लागिल्ल्या उज्यान भिरांकूळ रूप धारण केल्लें. ताका लागून गोंयभरांतल्यान विवीध वाठारांतले उजो पालोवपी दळाचे बंब थंय दाखल जाल्ले. शुक्रारा रातभर उज्याचेर नियंत्रण मेळोवपाचो जवानांचो यत्न चालू आशिल्लो. ह्या कावला अड्ड्याचो उजो रान वाठारांतूय पाविल्लो. रान खात्याच्या कर्मचाऱ्यांनी ताचेर नियंत्रण मेळोवपाक येस मेळयिल्लें. शेनवारा सकाळ सावन उजो पालोवपी दळाचे संचालक नितीन रायकार, राजेंद्र हळदणकार, सुशील मोरजकार आन हेर अधिकारी स्थितीचेर लक्ष दवरून थंय हाजीर आशिल्ले. ह्या उज्यांत कावला अड्ड्यांतल्या सगळ्या सामानांचो लासून गोबर जाला. शेनवारा सांजे मेरेन सुवातेचो धनी घडणुकेचे सुवातेर येवंक नाशिल्लो. ताका लागून थळाव्या लोकांनी नाराजी उक्तायल्या. त्या वाठारांत चालू आशिल्ले बेकायदो कावला अड्डे सासणाचे बंद करचे, अशी मागणी फोंडें वाठारांतल्या लोकांनी लावन धरल्या. शेनवारा उजो पालोवपा खातीर उजो पालोवपी दळाच्या बंबा सयत उदकाचे टँकर लेगीत थंय तैनात दवरिल्ले. उज्याक लागून फोंडें- मडगांव मार्गा वयली सगळी येरादारी बेतोडेंच्या बायपास मार्गा वयल्यान घुंवडायिल्ली. ताका लागून फोंडें शारांतली येरादारी शुक्रार सावन आडावल्या.
कावला अड्ड्यांच्या प्रस्नाचेर सरकारान लक्ष दिवचेः कवळेंकार
पंचायती वतीन कारवाय केले उपरांत कावला अड्डे चलोवपी न्यायालयांत दाद मागतात. न्यायालयान स्थिगिती दिले उपरांत कावला अड्डे आदले वरीच चालू उरतात. कावला अड्ड्यांच्या प्रस्नाचेर उपाय काडचे खातीर तेन्नाचे मुख्यमंत्री मनोहर पर्रीकार हांचे कडेन आपणे चर्चा केल्ली, पूण अजून मेरेन सरकारान कावला अड्ड्यां संबंदांत धोरण निश्चीत करूंक ना. गोंयांत गंभीर जाल्ल्या ह्या कावला अड्ड्यांच्या प्रस्नाचेर सरकारान गंभीरपणान लक्ष दिवपाची गरज आसा, अशें कवळेंचे आदले सरपंच राजेश कवळेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
