भांगरभूंय | प्रतिनिधी
भांगरभूंय । प्रतिनिधी
पणजीः हणजूण हांगच्या जमीन हडप प्रकरणांतली दुबावीत तेरेझा डिसोझा हिका 25 हजारांचो जामीन आनी हेर अटी घालून मुंबय उच्च न्यायालयाच्या गोंय खंडपिठान अटकपूर्व जामीन मंजूर केला. फुडली सुनावणी 12 जूनाक जातली.
हणजूण हांगची सर्वे क्र. 444/8 मदली 2,450 चौखण मीटर जमीन हडप केल्ल्याची कागाळ कॅनडांत राबितो करून आशिल्लो जमीन धनी जॉयस इझाबेल पिन्टो हाचे वतीन तांचो पॉवर ऑफ एटर्नी आंतोनियो डिकॉस्तान हाणे विशेश तपास पंगडा (एसआयटी) कडेन केल्ली. वेवसायीक रोहन हरमलकार (गोलती- तिसवाडी), मॅथ्यू डिसोझा (मुंबय), देवानंद कवळेकार (पिळर्ण), पीटर वाझ (हणजूण), फेलिक्स नोऱ्होना (शापोरा) आनी धुळेर- म्हापशेंच्या हेरांनी कटकारस्थान करून जमनीचे बोगस दस्तावेज तयार करून ती हरयाणांतल्या आकाश चौधरी आनी सीमा चौधरी हाका विकली अशें कागाळेंत म्हणल्लें.
ह्या प्रकरणांतली दुबावीत तेरेझा डिसोझान आपलो ह्या प्रकरणांत हात ना असो दावो करून सत्र न्यायालयांत अटकपूर्व जामिना खातीर अर्ज केल्लो. तो भायरायल्ल्यान तिणे गोंय खंडपिठान ताका आव्हान दिल्लें. तिजी बाजू आयकून खंडपिठान अटकपूर्व जामीन मंजूर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
