भांगरभूंय | प्रतिनिधी
भांगरभूंय । प्रतिनिधी
पेडणेः भाजपा सरकाराक साबार लोकांचें कांयच पडून गेल्लें ना. फाटल्या पाच दिसां सावन मोपा विमानतळार टॅक्सी कावंटर मेळचो हे खातीर टुगेदर फॉर इंटरनॅशनल मोपा ऍरपोर्ट संघटना धरणे आंदोलन करता. तांची ही सादी मागणी सरकाराच्यान मानून घेवपाक जायना. कॉर्पोरेट उद्देजकां खातीर कितेंय करपाक तयार आशिल्लें हें सरकार तांचेच खातीर आसा अशी टिका प्रदेश काँग्रेस अध्यक्ष अमित पाटकार हांणे केल्या.
मोपा विमानतळार हळदुव्या आनी काळ्या टॅक्सी स्टॅण्डा खातीर आंदोलन करपी टॅक्सीवाल्यांची पाटकार हांणे शुक्राराक भेट घेवन तांचे कडेन भासाभास करून काँग्रेस पक्षाचो तांकां तेंको जाहीर केलो. पाटकार हांच्या वांगडा विजय भिके, पेडणे गट काँग्रेस अध्यक्ष कृष्णा नायक, अॅड जितेंद्र गांवकार, प्रणव परब, वीरेंद्र शिरोडकार आशिल्ले. टॅक्सीवाले रस्त्यार आयल्यार काँग्रेस पक्ष लेगीत तांकां तेंको दिवपाक रस्त्यार येतलो अशें तांणी आंदोलन करपी टॅक्सीवाल्यांक सांगलें. सुकेकुळण- धारगळ ते मोपा विमानतळ वाठारांत जमाव बंदीचें 144 कलम लागू करून टॅक्सीवाल्यांचें आंदोलन चेपून उडोवपाच्या सरकारी यत्नाचो तांणी निषेध केलो.
मोपा विमानतळाचो थळाव्या गोंयकारांक लाब जायना जाल्यार भाजप सरकार कसले उगरगतीच्यो फोक्यो मारता असो प्रश्न करून उद्देगपतींच्यो ओला, उबर टॅक्सी हें सरकार गोंयांत हाडपाक सोदता असो आरोप पाटकार हांणे केलो. गोंयकारांक विशेश अर्थीक विभाग (सेझ) नाका म्हणटगीर काँग्रेस सरकारान तो रद्द केलो. प्रादेशीक आराखड्याक विरोध जातगीर तो रद्द केलो. सध्याचें भाजप सरकारान टॅक्सी आनी हेर ल्हान वेवसायिकांक चिड्डून उडोवपाक लागलां अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
