भांगरभूंय | प्रतिनिधी
भांगरभूंय । प्रतिनिधी
म्हापशेंः गांवसवाडो- म्हापशें हांगा आपल्या 20 नंबराच्या प्रभागांत राष्ट्रीय म्हामार्गाचे एके वटेन मातयेचो भराव घालून बेकायदेशीरपणान शेत जमीन पुरयता. हें प्रकरण आपल्याक लागना अशें मुख्याधिकारी सांगता आनी आमकांक कागाळ करपाक सांगतात. पावसाच्या दिसांनी हुंवारा सारकी परिस्थिती उप्रासल्यार लोक पालिका मंडळाकूच दोश दितले. शेत जमीन पुरयल्या ताची जोड पळोवणी करपाची मागणी नगरसेवक प्रकाश भिवशेट हांमी म्हापशें पालिका मंडळाचे बसकेंत केल्या.
जायते फावट मातयेचो भराव घालपाचो मुद्दो उपस्थीत करून पालिका अधिकाऱ्यांचें लक्षांत ही गजाल हाडून दिवपाचो यत्न केलो. एक वर्सा आदीं मुख्याधिकाऱ्यान पालिकेच्या तंत्रीक विभागाक पळोवणी करून अहवाल सादर करपाक सांगल्लें, मात अजून तो अहवाल मेळना. पालिकेचे अधिकारी ह्या प्रकारा कडेन जाणा जावंन आडनदर करतात. तो थांबयलो ना जाल्यार गांवसावाड्यार पावसाच्या दिसांनी हुंवार येवून परिस्थिती हाताभायर वतली अशी शिटकावणी भिवशेट हांणे दिल्या.
वेवसायीक कारणांक लागून शेत जमीन पुरोवपाचें हें काम चल्लां. थंय उबारल्ल्या एका गाड्याक पालिके वतीन वीज कनेक्शन घेवपाक एनओसी कशी दिली हाची चवकशी जावपाक जाय अशी मागणी भिवशेट हांणी नगराध्यक्ष प्रिया मिशाळ हिचे कडेन केल्या. जोड पळोवणी करपाची तारीख थारावपाचें उतर तिणें पालिका मंडळाक दिलां.
म्हापशें मार्केटांतल्या पालिका कर्मचाऱ्यांनी जप्त केल्ल्या अडेज लाखांच्याग गुटख्याचो प्रस्न नगरसेवक तारक आरोलकारान विचारलो. ह्या गुटख्याचे फुडें कितें जालें, ताचो खंय आनी कसो विलो लायलो हाची तपशीलवार म्हायती दिवपाची मागणी ताणे केली. जप्त केल्लो गुटखो पालिका निरीक्षका कडेन आसा अशें उपनगराध्यक्ष विराज फडकेन सांगलें. ह्या गुटख्याची चवकशी करपाची हमी नगराध्यक्ष मिशाळ हिणे दिली
म्हापशें पालिका कार्यालयांत एके व्यक्तीक विशेश वागणूक मेळटा. ती मुख्याधिकारी आनी नगराध्यक्षाच्या कॅबिनांत बसून आसता. पालिका मंडळानूय हे व्यक्ती आड पुलिसांत गुन्यांव दाखल केला. हे व्यक्तीक विशेश वागणूक दिवची न्हय अशें नगरसेवक तारक आरोलकारान सांगल
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
