भांगरभूंय | प्रतिनिधी
सगळ्यांच्या आवडीचे गोल- गोल आकाराचे लाडू. ह्या लाडवां वयल्यान ‘लाडू’ हें नांव खूप जाणांनी आपणायलां आसतलें. दुबाव ना. लाडू सभावान सामके गोड. दिसताय गोड आनी लागताय रुचीक बरे. लाडू करप ही एक कला. लाडू वळप ही एक कला. पळयतल्या खिणाक ते मनान भरचे. ते बरे वाटकूळेच जावंक जाय. गोडसाणीचें प्रमाण सारकें जावंक जाय.
लाडू मोटेय आसतात तशेच बारीकूय बी. कांय लाडू घट कांय मोव. चड करुन जाणट्यांक मोव आवडटात. दातांक त्रास नासतना खावंक बरे. लाडू जाय ते भशेचे करूं येतात. गोंयांत चड चलतात ते लाडू म्हळ्यार पिठ्याचे, बेसन, बियांचे, खाजीचे, बुंदीचे, डिंकाचे, काडयांचे, मुगाचे, रव्याचे, मोतीचूर आदी. वेगवेगळे जिनस वापरून हे लाडू तयार करूं येतात. आपणाक जाय तशें साखरीचें प्रमाण वापरून ते करतात. कांय लाडू गोड वापरून करतात जशे की घटगुळयो, तिळाचे लाडू. नांव जरी घटगुळयो आसले तरी ह्यो मोव करून खांव येता. ह्या लाडवांक कसलेय बरें कार्य आसल्यार खाशेलो मान. लग्न आसल्यार काडयांचे बुंदीचे लाडू तशेच मुजिक. जात्रा- फेस्तांक तर नारंगी- बेरंगी लाडू पळोवंक मेळटात.
खुपश्या जाणांक हे लाडू घरांत तयार करपाक आवडटात. जांकां जमना तीं विकते हाडून खातात. पूण, ह्या लाडवांक आमच्या पोटान तशेच घरान मानाचें स्थान आनी कार्याकूय बी तांकां तितलोच मान. सांज वेळची च्या आसूं वा गुरवार बायलेची फुलां, कसलीय आसूं पूजा वा दिवाळी, नातलां लाडू जायच. देवळांत दितात प्रसाद म्हणून तर कोण खाता टायमपासाचें खाण म्हणून. लग्नाच्या रिटर्न गिफ्टाचे पोतयेंत केन्ना च्या हॉटेलाच्या कावंटरार दवरिल्ल्या बरणेंत लाडू हो जायच. आकार एकूच वाटकुळोच, पूण रंग, रूपान रुचीन वेगवेगळे अशे हे लाडू. एकदां खाल्यार खावपाचे सोडचेनात. पूण लाडू बी आयज कालच्या भुरग्यांक चड खंय आवडटात? एक म्हण आसा हिंदीन ‘शादी का लड्डू जो खाये वो पछताये और जो ना खाये वो भी पछताये’. तेन्ना हांव म्हणटा शादीचो सोडातच सादो तरी लाडू खावन पळयात. चविश्ट, पुश्टीक रुचीचे लाडू मुद्दाम खायात. लाडू खायात, गोड उलयात.
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
