भांगरभूंय | प्रतिनिधी
येजमान सनरायझर्स हैदराबादाक इंडियन प्रिमीयर लिगेचे (आयपीएल) 47वे मॅचींत कोलकाता नायट रायडर्सा आड फकत 5 धांवड्यांनी हार घेवची पडली. हे हारीक लागून सनरायझर्स हैदराबादाचें सर्तींतलें आव्हान लागीं लागीं सोंपिल्ल्यांत जमा जालां. कोलकाता नायट रायडर्स लेगीत तेच वाटेर आसा. पूण, ह्या जैतान ताची सर्तींतली आस्त कायम उरल्या.
कोलकाता दिल्ले 172 धांवड्यांचे मोखीचो फाटलाव करतना हैदराबादाक 8 विकेटी वगडावन 166 धांवड्यो करप शक्य जाल्यो.
वरुण चक्रवर्तीन 20वी ओव्हर उत्कृश्ट घाली. सनरायझर्स हैदराबादाक जैता खातीर निमाणे ओव्हरींत 9 धांवड्यांची गरज आशिल्ली. पूण, वरुण चक्रवर्तीन फकत तीन धांवड्यो दिल्यो आनी आपल्या पंगडाक जैत मेळोवन दिवपाक मोलादीक हातभार लायलो.
मयांक अग्रवाल बऱ्या फॉर्मांत दिसतालो. पूण, 18 धांवड्यांचेर हर्षित राणान उत्कृश्ट बावन्सर घालून ताका बाद केलो. शार्दुल ठाकुरान दुसरो ओपनर अभिषेक शर्माक (9) बाद करून कोलकाताक मोठे येस मेळोवन दिलें.राहुल त्रिपाठी इम्पॅक्ट प्लेयर म्हणून मैदानांत देंवलो. पावर प्लेचे अखेरेचे ओव्हरींत आंद्रे रसेलाच्या पयल्या तीन बॉलांचेर त्रिपाठीन 16 धांवड्यो केल्यो. पूण, तिसऱ्या बॉलाचेर ताचो स्विप फसलो. अरोरान शिमे लागसार ताची कॅच धरली. त्रिपाठीन णव बॉलांनी 20 धांवड्यो केल्यो. इम्पॅक्ट प्लेयर अनुकूल रॉयान सातवे ओव्हरींत हॅरी ब्रुकाक (0) एलबीडब्लू बाद केलो. अनुकुलान घाल्ले 11वे ओव्हरींत एडन मार्करम आनी हॅन्रीच क्लासेन हांणी दोन सके मारून वट्ट 15 धांवड्यो केल्यो.
हैदराबादा मुखार 54 बॉलांनी 82 धांवड्यांचें आव्हान आशिल्लें आनी मार्करम आनी क्लासेन हांणी 37 बॉलांनी 50 धांवड्यांची भागिदारी पुर्ण केली.
दक्षीण आफ्रिकेचे बॅट्समन बरी बॅटींग करतना दिसले. तांचे बॅटिंगेक लागून हैदराबादाची आस्त वाडिल्ली. ही जोडी फोडपाक शार्दुल ठाकुराक परतून बॉलिंगेक हाडलो आनी ताणें आपल्या मुखेल्याचो निर्णय योग्य थारायलो. ताणें क्लासेनाक बाद केलो. क्लासेनान 20 बॉलांनी 36 धांवड्यो केल्यो. ताणें बाद जावचे पयलीं मार्करमा वांगडा 47 बॉलांनी 70 धांवड्यांची भागिदारी केल्ली. तरी लेगीत शार्दुलाचे ते ओव्हरींत 10 धांवड्यो करून हैदराबादान मॅच 30 बॉलांनी 38 अशी लागीं हाडिल्ली.
वरुण चक्रवर्तीन 16वे ओव्हरींत फकत चार धांवड्यो दिल्ल्यान मॅच उमळशीक वाडोवपी स्थितींत पावली. वैभव अरोराचे ओव्हरीच्या पयल्या बॉलाचेर चवको आयलो. पूण, चवथ्या बॉलाचेर मार्करमान चुकीचो शॉर्ट मारलो. मार्करम 41 धांवड्यांचेर कॅच बाद जालो.
समद आनी मार्को यान्सेन हांकां 18वे ओव्हरींत फकत 5 धांवड्यो दिल्यो. पूण, कोलकातान धांवबाद करपाच्यो तीन संदी चुकयल्यो.
अरोरान 19वे ओव्हरींत यान्सेनाक बाद करून कोलकाताची आस्त वाडयली. विकेटकीपर गुरबाजान जबरदस्त कॅच धरली. हैदराबादाक 11 बॉलांनी 20 धांवड्यांची गरज आशिल्ली. भुवनेश्वर कुमारान पयल्याच बॉलाचेर चवको मारलो. तातूंत नो बॉलाचेर आनीक एक चवको मेळ्ळो. 6 बॉलांनी 9 धांवड्यो अशी मॅच जाल्ली. वरुणाचे ओव्हरीच्या तिसऱ्या बॉलाचेर अब्दुल (21) कॅच बाद जालो. अशे तरेन तीन बॉलांनी सात धांवड्यांची गरज आशिल्ली. पूण, हैदराबादाक 8 विकेटी वगडावन 166 धांवड्यो करप शक्य जाल्यो आनी कोलकातान 5 धांवड्यांनी जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
