भांगरभूंय | प्रतिनिधी
पेडणें: पेडणेंच्या नगराध्यक्षपदार सिद्धेश बाबुराव पेडणेंकार हांची बिनविरोध निवड जाली. पेडणें पालिकेच्या रित्या आशिल्ल्या नगराध्यक्षपदा खातीर सिद्धेश पेडणेंकार हांचो एकसुरो अर्ज आयिल्लो. 4 मेक घेतिल्ले खाशेले बसकेंत वेंचणूक अधिकारी तशेंच पेडणें म्हाल जिल्होधिकारी दीपक वायंगणकार हांणी सिद्धेश पेडणेंकार हांची बिनविरोध निवड जाल्ल्याचें जाहीर केलें.
ह्या वेळार नियुक्त नगरसेवक म्हूण पेडणें मतदारसंघाचे आमदार प्रवीण आर्लेकार, उपनगराध्यक्ष आश्विनी पालयेंकार, नगरसेविका उषा नागवेंकार, नगरसेविका तृप्ती सावळ देसाय, नगरसेविका विशाखा गडेकार आनी नगरसेवक शिवराम तुकोजी हाजीर आशिल्ले. हे बसकेक विष्णू साळगांवकार, राखी कलशांवकार आनी माधव सिनाय देसाय हे नगरसेवक गैरहाजीर राविल्ले.
नगराध्यक्षपदार बिनविरोध निवड जाले उपरांत सिद्धेश पेडणेंकार हांणी सांगलें, पेडणें पालिका वाठाराचो आमदार आर्लेकार तशेंच सगळ्या सांगात्यांक वांगडा घेवन उदरगत करतलों. पुराय गोंयांत नगराध्यक्षपदार पाविल्लो आपूण दलीत समाजांतलो पयलो मनीस. डॉ. बाबासाहेब आंबेडकर हांकां लागून आपूण ह्या पदा मेरेन पावपाक शकलों. तेचवरी भाजपा प्रदेशाध्यक्ष, मुख्यमंत्री आनी आमदार आर्लेकार हांकां लागून नगराध्यक्ष जावपाचो मान आपल्याक फावो जालो.
पेडें पालिकेचे उदरगती खातीर सिद्धेश पेडणेंकार हांणी सगळ्यांक वांगडा घेवन वावर करचो, आपलो तांकां सदांच तेंको आसतलो, अशें आमदार आर्लेकार हांणी सांगलें.
ह्या वेळार सिद्धेश पेडणेंकार हांकां विवीध समाजीक संस्था तशेंच समाजांतल्या विवीध घटकां वतीन परबीं भेटयली. नगराध्यक्षपदार निवड जाले उपरांत सिद्धेश पेडणेंकार हांणी पालिका बागेंतल्या डॉ. बाबासाहेब आंबेडकर हांच्या पुतळ्याक फुलांचो हार घालून आर्गां ओंपलीं.
पयलेच खेपे दलीत समाजांतली व्यक्ती नगराध्यक्षपदार
अलिखीत कबलाती प्रमाण माधव सिनाय देसाय हांणी नगराध्यक्षपदाचो राजिनामो दिल्लो. ते उपरांत अलिखीत कबलाती प्रमाण नगराध्यक्षपद सिद्धेश पेडणेंकार हांकां फावो जालें. 1989 ते आतां मेरेन पेडणें पालिकेचें नगराध्यक्षपद वट्ट 21 जाणांनी भुशयलां. 22 वो नगराध्यक्ष म्हूण पयलेच खेपे दलीत समाजांतली व्यक्ती ह्या पदा मेरेन पावल्या. पेडणें पालिकेच्या इतिसाहासांत आतां मेरेन सगळ्यांत चड नगराध्यक्षपदाचो काळ डॉ. वासुदेश देशप्रभी हांकां फावो जाला. तांणी आठ व र्सां नगराध्यक्षपद येसस्वी तरेन सांबाळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
