भांगरभूंय | प्रतिनिधी
तंत्रगिन्यानाक लागून नोकऱ्यो ना जावपाचे दावे जायतीं वर्सां सावन सुरू आसात. धा वर्सां आदीं ऑक्सफर्ड विद्यापिठाचे कार्ल फ्रे आनी मायकल ऑसबोर्न हांणी एका संशोधन पत्रांत फुडल्या धा ते वीस वर्सांत अमेरिकन कामगारांच्यो 47% नोकऱ्यो स्वयंचलीत जातल्यो, असो दावो केल्लो. रोबोटांची संख्या रोखडीच मनशां परस चड जातली, अशें टेस्लाचे धनी एलान मस्क सांगतात. पूण, तंत्रगिन्यानाक लागून नोकऱ्यो वचपाची भिरांत खरी जावंक ना. दरेक बेकार अमेरिकनाक दोन नोकऱ्यो मेळटात. पूण, रोबॉट वापरपी उद्देग- धंद्यांचो आंकडो वाडत आसा.
अमेरिकन उद्देगीक गट अॅडव्हान्सड ऑटोमेशन असोसिएशनाचे अध्यक्ष जेफ बर्नस्टीन सांगतात, हालींच्या काळांत कांय उद्देग- धंद्यांनी रोबोटांचो वापर वाडला. संगणकाक लागून मशीनां चड कार्यक्षम आनी सक्षम जाल्यांत, अशें स्वित्झर्लंडांतल्या एबीबी कंपनीचो रोबोटिक्स वेवसाय चलोवपी सामी अथिया सांगतात. हलक्या वजनाचे रोबोट कामगारांच्या बरोबर काम करतात. स्वयंचलीत वाहनां कारखाने आनी गुदांवां मदीं माल व्हरतात.
आर्क इन्व्हेस्ट अॅसेट मॅनेजमेंटाच्या म्हणण्या प्रमाण, उद्देगीक रोबोटांचें मोल 2005 वर्सा 56 लाख रुपया आशिल्लें तें 2017 वर्सा 22 लाख रुपया जालें. डिसेंबरांत एबीबीन शांघायांत व्हड कारखानो सुरू केलो. हांगा रोबॉट तयार करतात. इंटरनॅशनल रोबोटिक्स फेडरेशनचे सरचिटणीस बिलर म्हणतात की, रोबोट्स बसोवपाचो खर्चूय कमी जाला.
संवसारांतल्या रोबोटांची संख्या 2011 वर्सा 10 लाख आशिल्ली ती 2021 वर्सा 35 लाख जाली. जपानी रोबोट निर्माते फॅनुक कंपनीची विक्री सेगीत तिमाहींत 17 टक्क्यांनी वाडिल्ली. केयेन विक्रींत 24 टक्क्यांनी वयर उडी मारली. पूण 2021 वर्साचे तुळेंत विक्री मात्शी उणी जाल्या. त्या वेळार कोविडाक लागून कर्मचाऱ्यांचो आंकडो उणो जाल्ल्यान जायत्यो कंपनी रोबोट विकत्यो घेताल्यो. रोबॉट कंपनींच्या शेअरांत 20 टक्क्यांनी सुदारणा जाली. रोबोटांचो आंकडो वाडला तरी तांचो वापर अजूनय उणो आसा. दक्षीण कोरियांतल्या कंपनींनी दर धा कर्मचाऱ्यां फाटल्यान एक उद्देगीक रोबोट आसता. अमेरिकेंत, चीन, युरोप आनी जपानांत दर 25 ते 40 कर्मचाऱ्यां फाटल्यान एक रोबोट आसा. संवसारीक भांडवल खर्चांत 2020 वर्सा उद्देगीक रोबोटांचो वांटो 1% परस उणो आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
