भांगरभूंय | प्रतिनिधी
प्रचाराची सांगता; ‘साटलंट’ मतदार थारतलो म्हत्वाचो
भांगरभूंय । प्रतिनिधी
दिवचलः सांखळी नगरपलिके खातीर 6 मे ह्या दिसा मतदान जातलें. सध्या भाजपा गट आनी टुगेदर फॉर सांखळी ह्या दोनूय गटांतल्या उमेदवारां मदीं विशेश लडत जातली. बुधवारा उमेदवारांनी पुराय दीस घराघरांनी प्रचार करून मतदान करपाचो उलो मारलो.
भाजपा मुखार टुगेदर फॉर सांखळी गटान खर आव्हान उबें केलां. भाजपानूय आपलो आक्रमक भुमिका कायम दवरल्या. ‘सायलंट’ मतदारांची भुमिका हे वेंचणुकेंत म्हत्वाची थारतली. ताका लागून खूबशा प्रभागांनी चुरस वाडल्या. मुख्यमंत्री डॉ. प्रमोद सावंत हांणी आपले तरेन सगळ्या उमेदवारांचे मजती खातीर फुडाकार घेतला. फाटल्या चार वर्सां सांखळे उदरगतीक चालना दिल्या. मतदार निश्चीतपणान भाजपाक तेंको दितले, असो विस्वास मुख्यमंत्री डॉ. सावंत हांणी उक्तायला. भाजपाचे खूबशे फुडारी धावूय प्रभागांनी वावुरतात. तांणी घराघरांनी वचून प्रचार केला.
मंडळ अध्यक्ष गोपाळ सुर्लकार हांणी म्हणलां, आमी आमचो अजेंडा घेवन काम करतात. कोणेच आमकां आडावंक ना. विरोधकांक हार दिसपाक लागिल्ल्यान ते फटीचे आरोप करीत सुटल्यात. आमकां जैताची पुराय खात्री आसा.
टुगेदर फॉर सांखळीचे धर्मेश सागलानी, प्रवीण ब्लॅगन हांणी पॅनला खातीर विशेश यत्न केल्यात. दरेका घरांत संपर्क करून फिल्डींग लावपाची रणनिती आपणायल्या. आमकां मतदार परतून एकदां संद दितले. आमी धा वर्सांत नवे प्रयोग, नव्यो येवजण्यो आनी सांखळीचे उदरगती खातीर वावर केला, ताची पावती मतदार दितले, अशो विस्वास सागलानी आनी ब्लॅगन हांणी उक्तायला. हेर अपक्ष उमेदवार लेगीत आपले पद्दतीन प्रचार करून संपर्क दवरपांत येसस्वी जाल्ल्याचें सांगतात. 5 मे ह्या दिसा मतपेटयेंत मतदार कोणाक कौल दितले हाची सांखळेकारांक उमळशीक लागल्या.
भाजपाक घसघशीत येसः सदानंद तानावडे
सांखळी पालिका वाठारांत प्रचार करून नियाळ घेतला. भाजपाक घसघशीत येस मेळटलें. राज्य आनी केंद्रांत भाजपाचें सरकार आसा. तेचवरी थळावे आमदार मुख्यमंत्री आशिल्ल्यान ताचो निश्चीत फायदो भाजपा उमेदवारांक जातलो, अशें प्रदेशाध्यक्ष सदानंद तानावडे हांणी सांगलें.
टुगेदर फॉर सांखळीक निश्चीत कौलः प्रवीण, धर्मेश
मतदान बॅलेट पेपराचेर जातलें, तें गुप्त उरतलें, तें कोणाकूच पळोवपाक मेळचें ना. हे खातीर कोणाकूच भिये नासतना मतदान करात, असो उलो टुगेदर फॉर सांखळीचे प्रवीण ब्लॅगन आनी धर्मेश सागलानी हांणी मारला. ह्या पॅनलांतल्या उमेदवारान केन्नाच उदरगतीचे बाबतींत वा वैयक्तीक पांवड्याचेर आपल्या पदांचो गैरवापर करूंक ना. ताका लागून हे वेंचणुकेंत ह्यो सगळ्यो गजाली मतींत दवरून मतदार ह्या पॅनलाच्या सगळ्या धावूय उमेदवारांक कोल दितले, असो विस्वास तांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
