भांगरभूंय | प्रतिनिधी
भांगरभूंय । प्रतिनिधी
सांगेंः तरणाट्यांनी वाचनांतल्यान आपली जीण समृद्ध करपाक जाय. सगल्या बुद्धिवंतांनी वाचनांतल्यान आपली जीण घडयल्या आनी पुराय संवसाराक बरी देख घालून दिल्या अशें जेष्ठ शिक्षक आनी लेखक सुरेश भंडारी हाणे सांगलें. मळकर्णे हांगाच्या समाज सेवा संघटनेच्या आराधना ग्रामीण वाचनालयान संवसारीक पुस्तक दिसा निमतान घडोवन हाडलेल्ले कार्यावळींत ते उलयताले.
इंजीनिअर शैलेश संझगिरी हांणी कार्यावळीची येजमानकी चलयली. माचयेर निवृत्त लश्करी अधिकारी आनी बॅन्कर सतीश लोटलीकर आनी चंद्रकांत गांवकर आशिल्ले. भंडारी हाणे फुडें सांगलें कीं आयज जरी मोबाईलान मनशाची पुराय जीण बदलून उडयली तरी हे दीस बदलतले आनी लोक परत पुस्तक इश्ट जातले. विद्यार्थ्यांचेर शालेय जिवितांत वाचन संस्कार जावंक जाय अशेय ताणे म्हणले.
संझगिरी हांणी पुस्तक दीस संवसारीक पांवड्यार पाळपा फाटलो इतिहास सांगलो. गांव वा शाळांतल्या वाचनालयाचो जितलो चडावत उपेग जातलो तितलीच समाज जीण बदलून वतली अशें सांगलें. सतीश लोटलीकार हांचेय उलोवप जालें. सुरवेक दिवली पेटोवन कार्यावळीक सुरवात जाली. समाज सेवा संघटनेचो सचीव. विठ्ठल सावंत आवदियेकारान प्रास्ताविक केलें. सायली नायक आनी प्रियान्का गांवकार हाणी संयोजन पळयले. आशिष करमली, हरी गांवकार ह्या वेळार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
