भांगरभूंय | प्रतिनिधी
जमनीर बसल्यार कुडीक जायते फायदे जातात. देखून आदल्या काळांत लोक चडशें काम जमनीर बसून करताले. लोक जमनीर एकठांय बसून जेवताले. आयुर्वेदांत ही संवय आमचे भलायके खातीर खूब फायदेशीर अशें म्हळां. जेन्ना आमी खूब थकतात तेन्ना थोडो वेळ जमनीर बसल्यार आमकां बरें दिसता. आयज लेगीत भारतांतल्या जायत्या ल्हान- व्हड घरांनी लोक जमनीर बसून जेवतात. मात हेंय मतींत घेवपाक जाय की पिरायेची चाळिशी हुपली काय आसनमांडी घालून जमनीचेर बसप शक्य जायना. त्रास जातात. तेन्ना सगल्यांनी दिसांतल्यान अर्द वर तरी जमनीचेर बसचें.
जमनीर बसपाचे फायदे….
आयुर्वेदांत जमनीर बसपाचे फायदे सांगल्यात. जमनीर बसपाचो एक मुखेल फायदो जाता तो फाटीच्या कण्याक. जायत्या जाणांक तांचो कणो सरळ दिसता, पूण खरेपणीं तो एस आकाराचो आसता. चड फावटीं चुकीचें पद्दतीन बसल्यार फाटीच्या कण्याक त्रास जाता. पूण कांय मिण्टां जमनीर सरळ बसल्यार ह्या त्रासा पसून सुटका मेळटा. हाका लागून हाडा घटमूट जातात, तशेंच समतोल आनी स्थिरताय घट जाता. दर दिसा कांय मिण्टां जमनीर बसल्यार कुडीक बळगें मेळटा अशें तज्ञांचें मत आसा. पूण जायते जाण जमनीर बसपाची संवय विसरपाक लागल्यात. तशेंच हिप फ्लेक्सर्साक ताचो फायदो जाता. कमर आनी सकयले स्नायू जमनीर बसल्यार घट जातात. जमनीर बसपाचो एक फायदो म्हळ्यार ताका लागून बसपाची
मुद्रा सुदारता.
जमनीर बसताना ह्यो गजाली याद दवरात….
जमनीर बसतना सदांच आडव्या पायांन म्हळ्यार सुखासन आसन घेवन बसचें. आनी ह्या वेळार मान सकयल घालून बसचें न्हय.
फाटीचो कणो दुखल्यार सकयल उशें दवरुन ताचेर बसचें.
जमनीर बसपाची संवय करतात तर मदीं मदीं पांय पातळावचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
