अशीय एक भोंवडी

भांगरभूंय | प्रतिनिधी

कोल्हापूर, पुणे, नाशिक, शिर्डी. थंयचे खाशेलेपण म्हळ्यार नानारूपी उन्नत लक्षणीय देवळां, लोकांचो भेस, बोली, तांचे दायज, साबार जेवणांचो आस्वाद, निराळे पद्धतीन थाळयेन सजयल्ले रुचीक पदार्थ, पेयां, ताजीं टवटवटीत पेरां, द्राक्षांचे मळे, रिक्षा सवारी हो सगळो अप्रूपी प्रवास केन्ना सोंपत आयलो तें कळ्ळेंच ना.

सगळ्यांक खंय ना खंय भोंवपाक वचपाची इत्सा आसता. बकेट लीस्ट हें तोंडपाठ आसता पूण कांय जाणांचीं बकेट लिस्टाची वळेरी पर्याय वाचींत घुस्पता तर कोणा – कोणाची सुरवातच जाणटेंपणार जाता वा कांयजाणां ती पुराय करपाक खंयच कोंप्रोमायज करनात. म्हजे बकेट लिस्टान भोंवडी हो शब्दुच नाशिल्ल्यान बॅग पॅक करपाचो प्रश्नच आयलो ना. दर वर्सा मायाचे सुटयेन सगळींच गोंया भायर , भारतातल्या विविध राज्यानीं वा परदेशांत भोवपाक वचप आनी जूनांत तांचेर स्टाफरुमांत मनसोक्त चर्चा करप आनी हांव मात तांच्या चर्चेंत रंगप हो म्हजो आगळो – वेगळो छंद. हे सुटयेन सगळ्यानींच हट्ट धरलो आनी बॅग पॅक करुन देव दर्शनाची रोड ट्रीप प्लान केली.
एक व्हड श्वास घेतं देवाच्या नांवान फांत्या पारार प्रवासाक सुरवात जाली. मळबांत पिट्टवरी लिकलिकपी चान्न्यांची ओडणी, तातून चंद्र आमचो सांगाती. रस्त्यार खांब्यांचेर लिक्क लायटी आनी पुलार पावताच रंगीत लायटींनी गजबजलेली न्हंय, बोटींनी मांडवींत मांडलेलो थाट. शितळ वारें, वेगान वचपी गाडी. मांडवी म्हजे नदरे आड जायसर हांव पळयत रावलें. अदींमदीं लकार येतालीच, पुण वाठार बदलता तस – तसो दर वाठार म्हजें लक्ष वेदून घेतालो. हळुहळू आता जळींथळीं काजूंचो दरवळ पडलो. तो हुंगत पेडणेचो वाठार गाठलो. गच्च काजीनीं भरलेले वाटेर सोऱ्याच्यो भाटयो लेगीत दिसल्यो. काजींची वाट सारीत गाडयेचीं चाकां आतां आंबोली घाटां वटेन वळत आसली. गच्च भरिल्ले आल्त दोंगर जीव गळ्या कडेन हाडपी आकंताळीं नागमोडी वळणां आनी गिरगिऱ्या वरी घुंवत मुखार वाट सारपी गाडयेची रोदां.
हांसत खेळत च्या हॉटेलार पावलीं तशी तोंडातल्यान धुंवर भायर काडपी चमचमीत झणझणीत मिसळ आनी तोरट गोड एक – एक कटींग मागयली. हो तिखट – गोड आस्वाद, नवो बदल जाणवलो. पयलेच खेपे चार पावलां नव्यान चलपाची धादोसकाय झळकताली. चलते गाडयेन वाऱ्याच्या झोतार असंख्य मनांत विचार येताले की यत्न केल्यार जैत मेळटाच, फकत निडरपणान वावुरपाची गरज, मनाची तयारीय तितकीच लागता.
शिर्डीचो पयलो मुक्काम थारिल्लो. वळणार – वळणां , निळ्या मळबा पोंदा तपकिरी दोंगराचे थाट पळयत शिर्डी पावलीं. हॉटेलान फ्रेश जाली. शिर्डी भोवलीं आनी सकाळीं साईच्या दर्शनाक रांगेंत उबीं रावली. थंयची खेट पळोवन मात शेळो घाम फुटलो. तरीय नकळत एकमेकांक, लोकांक पळयत न सोंपणारी साईबाबाच्या दर्शनाची वाट मेकळी जाली तीय बी एकमेकांक धक्काबुक्की करीत. फायनली देवदर्शन जालें, तेय भी फोटो पेटोवपी फ्लेशा वरीं क्लीक जालें. झळकेक साईबाबा दिसलो अन् आमकां एक्सीट वाटेर वळचीं पडलीं. शिर्डी कोण उपाशी उरचो ना हें नक्की. सकाळ फुडेंच पावाला पावलार खाणावळी, रस्त्यार खाचीकुशीन एडजस्ट करीत च्या टपरेर शिजपी च्या, बटाटफोव, डोसा, वडा आदीं तयार. तातून अदीं – मदीं भोवपी फेरयेकार. ह्या सगळ्या गजबजान वाट काडीत मुखार वचपी पर्यटकांच्यो गाडयो.
फुडलो मुक्काम थारयत कोल्हापुरची वाट धरीत थेठ महालक्ष्मीच्या दर्शना पावलीं. आमोरेर आमी कोल्हापूर पावली. थंड वाऱ्याचे झोत भक्तांनी भरिल्ले देवळाचे सरभोंवतणीन, पावलां देवळा कडेन वळ्ळीं. कोल्हापूरचे आवाढव्य थंडसार देवळाच्या परिसरांत रमलेले मन. पायऱ्यो चडत देवळांत पयलेच खेपे पावल पडलें तें गुंफेन पाविल्ले वरीं दिसतालें. गचागच्च रांगेन देवीच्या दर्शनाक. उब्या खांब्याचेर नदर पडली. सगळ्यांचेर सुंदर नक्षीकाम पळोवपाक मेळ्ळें आनी तेंच पळयत -पळयत देवीच्या गाभाऱ्या कडेन पावन देवीचें दर्शन घेतलें.
कोल्हापूर, पुणे, नाशिक, शिर्डी. थंयचे खाशेलेपण म्हळ्यार नानारूपी उन्नत लक्षणीय देवळां, लोकांचो भेस, बोली, तांचे दायज, साबार जेवणांचो आस्वाद, निराळे पद्धतीन थाळयेन सजयल्ले रुचीक पदार्थ, पेयां, ताजीं टवटवटीत पेरां, द्राक्षांचे मळे, रिक्षा सवारी हो सगळो अप्रूपी प्रवास केन्ना सोंपत आयलो तें कळ्ळेंच ना. विभिन्न पद्धतीन रावप, उलोवप, जेवप हें सगळ्या वेगळेपणांत अशीय एक भोंवडी अणभपाक मेळ्ळी.

अतिशा सुर्लीकार
7262849923