भांगरभूंय | प्रतिनिधी
अंदूंचे इंडियन प्रिमियर लिगेंत (आयपीएल) कांय खेळगडे सोंपिल्ल्यांत जमा जाल्यार अशें जाणकार म्हणटाले अशे साबार खेळगडे पर्जळ्ळपाक लागल्यात. काल नंबर आशिल्लो ईशान शर्माचो. ताणें अखेरचे ओव्हरींत 12 धांवड्यांची राखण करपाची आशिल्ली. पूण, ताच्या मुखार हार्दिक पांड्या आनी राहुल तेवतिया हे आक्रमक बॅट्समन आशिल्ले. पूण, ईशान शर्मान एक विकेट घेतना फकत 6 धांवड्यो दिवन दिल्ली कॅपिटल्साक अशक्य अशें जैत मेळोवन दिलें.
दिल्ली कॅपिटल्सान येजमान गुजरात टायटन्साक 5 धांवड्यांनी हारोवन आपलें तिसरें जैत जोडलें. गुजराता वतीन हार्दिक पांड्यान नाबाद 59 धांवड्यो केल्यो. जाल्यार राहुल तेवतियान सात बॉलांनी 20 धांवड्यो करून दिल्लीचें टॅन्शन वाडयिल्लें.
ते पयलीं गुणतकट्यांत पयले सुवातेर आशिल्ल्या गुजरात टायटन्सा आड टॉस जिखून दिल्ली कॅपिटल्साक पयलीं बॅटींग करपाचो निर्णय घेतलो. पूण, ताका निर्धारीत 20 ओव्हरींनी 8 विकेटी वगडावन 130 धांवड्यां मेरेन मजल मारप शक्य जालें.
गुजराता वतीन मोहम्मद शमीन 4 ओव्हरींनी 11 धांवड्यो दिवन 4 विकेटी घेतल्यो. अखेरेक अमन हकीम खानान 51 धांवड्यांची अर्द शेंकड्याची खेळी केली जाल्यार अक्षर पटेलान 27 धांवड्यो करून दिल्लीची लज राखली.
मोखीचो फाटलाव करपी गुजरात टायन्साची सुरवात बरी जाली ना. खलिल अहमदान पयलेच ओव्हरींत वृद्धिमान साहाक बाद करून गुजराताक पयलो धपको दिलो. एनरिच नॉर्खिया आनी इशांत शर्मा हांणी वळेरेन शुभमन गिल (6) आनी विजय शंकर (6) हांकां बाद केले.
पावर प्लेंत गुजराताची ताकद गेली. कुलदीप यादवाचे बॉलिंगेचेर रिव्हर्स स्वीप मारपाच्या यत्नांत डॅव्हिड मिलर (0) बोल्ड जालो.
गुजराताचे 4 बॅट्समन फकत 32 धांवड्यांचेर तंबूंत गेले. मुखेली हार्दिक पांड्या आनी अभिनव मनोहर हांणी गुजराताच्या डावाक आकार दितना बरी भागिदारी केली. पूण, दिल्लीच्या बॉलरांनी धांवगतीचेर अंकूश दवरिल्ल्यान गुजराताचेर चेपण कायम आशिल्लें.
36 बॉलांनी 60 धांवड्यांची गरज आशिल्ली. हार्दिक आनी अभिनव हांणी अर्द शेंकड्याची भागिदारी पुर्ण करतना मॅचींतली चुरस कायम राखिल्ली. हार्दिक पांड्यान सुंदर अशे शॉर्ट मारून मॅच 18 बॉलांनी 37 अशी लागीं हाडिल्ली. 18वे ओव्हरींत खलिल अहमदान ही 63 धांवड्यांची भागिदारी फोडली. अभिनव 26 धांवड्यो करून बाद जालो. खलिलान ते ओव्हरींत फकत चार धांवड्यो दिवन एक विकेट घेतली. ताका लागून 12 बॉलांनी 33 अशी चुरशीची मॅच जाली. नॉर्खियान पयल्या तीन बॉलांचेर तीन धांवड्यो दिल्यो पूण, फुडल्या तीन बॉलांचेर राहुल तेवतियान सेगीत तीन सके मारून मॅच घुंवडायली. गुजराताक निमाणे ओव्हरींत 12 धांवड्यांची गरज आशिल्ली.
इशान शर्मान आपलो सगलो अणभव पणाक लायतना राहुलाक (20) बाद केलो. मॅच 1 बॉल सात धांवड्यो अशी जाली. हार्दिक 59 धांवड्यो करून नॉ स्ट्रायकराचेर आशिल्लो जाल्यार राशिद खान स्ट्रायकाचेर आशिल्लो. इशानान एक धांवडी दिल्ल्यान गुजराताक 6 बाद 125 धांवड्यांचेर मानचें पडलें आनी दिल्लीन 5 धांवड्यांनी जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
