भांगरभूंय | प्रतिनिधी
भांगरभूंय । सांस्कृतीक प्रतिनिधी
पणजीः वामन सरदेसाय मेमोरिअल ट्रस्ट आनी वेदांता इन्स्टिट्यूट हाचे वतीन सुटके झुजारी, लेखक, कवी आनी सनदी अधिकारी सर्गेस्त वामन सरदेसाय जल्मशती कार्यावळ शुक्रार 5 मेक सांजे 5.30 वरांचेर पणजे शारांतल्या गोंय चेंबर ऑफ कॉमर्साच्या सभाघरांत आयोजीत केल्या.
कार्यावळीक मुखेल सोयरे म्हणून आदले केंद्रीय कायदो मंत्री रमाकांत खलप हाजीर रावतले. कार्यावळीची येजमानकी इन्स्टिट्यूट मिनेझिस ब्रागांझाचे अध्यक्ष आनी ज्येष्ठ कवी दशरथ परब चलयतले. ताचे हस्तुकीं वामन सरदेसाय हांच्या माओम्बी (मराठी) आनी वज्राची खण (कोंकणी) ह्या पुस्तकांचें प्रकाशन जातलें. ट्रस्टाची विश्वस्त तशेंच सर्गेस्त वामन सरदेसाय हांची घरकान्न
लिबिया लोबो सरदेसाय हिणे मंगळाराक घेतिल्ले पत्रकार परिशदेंत ही तशेंच जल्मशती कार्यावळीची म्हायती दिली, ह्या वेळार रमाकांत खलप, प्रा. शशिकांत सरदेसाय आनी संजीव सरदेसाय हाजीर आशिल्ले.
लिबिया लोबोन सांगलें की वामन सरदेसाय हांणी तरणाटेपणान गोंय मुक्ती चववळींत वांटो घेतलो. तेन्ना ते मेडिसिनाच्या पयल्या वर्साक आशिल्ले. 1948 वर्सा ताका पोर्तुगेज मिलिटरी त्रिबुनालान 9 म्हयन्याची बंदखणीची ख्यास्त फर्मायली. उपरांत ताका पांच वर्सा निलंबीत केलें. मागीर ते मुंबय आकाशवाणी केंद्रांत कामाक लागले. ताणे आणी हांवे सावंतवाडी लागी पश्चीम घाटांतल्या रानांत क्लेनडेस्टिन रेडिओ स्टेशन सुरू करून ताका व्हॉयस ऑफ फ्रीडम अशें नांव दिलें. गोंय मुक्ती उपरांत सरदेसाय नागरी सेवेंत रुजू जाले आनी आयएएस ही उपाधी ताका दिली. ती मेळोवपी ते पयले गोंयकार आशिल्ले. सेवा निवृत्ती उपरांत भारत सरकारान ताची आंगोलाचो राजदूत म्हणून नेमणूक केल्ली.
अभिजित ह्या टोपण नांवान सरदेसाय हांणे कविता बरयल्यात. वेदांताचो प्रचार ताका अभिप्रेत आशिल्लो. वेदांता म्हणल्यार धर्म न्हय जाल्यार उपनिषद तत्वगिन्यान. ट्रस्टा वतीन वेदांताचे वर्ग चलयतले अशी म्हायती लिबिया लोबो हिणे दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
