भांगरभूंय | प्रतिनिधी
भांगरभूंय । प्रतिनिधी
वाळपयः म्हाऊस पंचायत वाठारांतल्या नागवे हांगच्या ग्रीन व्ह्यू ह्या रेस्टॉरन्टांत फ्रायड रायस हाडपाक गेल्ल्या थळाव्या तरणाट्याक तीग जाणांनी मारपेट केल्ल्यान गांवांतलें वातावरण तापलें. ह्या रेस्टॉरन्टांत गैरवेव्हार सुरू आशिल्ल्यान ताचो परवानो रद्द करचो अशी मागणी नागवें वाठारांतल्या हरिजन भावांनी केल्या. ते खातीर ताणी वाळपय पुलीस स्टेशनांत मंगळाराक मोर्चो व्हरून अटक केल्ल्या एका दुबाविताक मारपेट करपाचो यत्न केलो. पुलीस उपनिरीक्षक विष्णू जाधव हाणे लोकांची समजूत काडली.
मेळिल्ले म्हायती प्रमाण अनमोल खांडेपारकार हो तरणाटो सोमाराक सबंदीत रेस्टॉरन्टांत फ्रायड रायस हाडपाक गेल्लो. दर विचारलो तेन्ना ताका 100 रुपये प्लेट अशें सांगलें. उपरांत देडशें रूपये अशें सांगतगीर खांडेपारकारान आपल्याक तो नाक अशें सांगलें. ह्या वेळार रेस्टॉरन्टाचो धनी प्रदीप पार्सेकार (केरी), तागेले कामगार राजेश सावंत आनी विरो काळे हांणी ताका मारपेट केली. ताचे तकलेर लाकडा दांडो मारल्ल्यान ताखा जखम जाली आनी तो जमनीचेर पडलो. लोकांक कळतगीर ताणे येवून ताका व्हेलो.
खांडेपारकाराच्या घरच्यांनी दिल्ले म्हायती प्रमाण अनमोलाक मारपेट करून ताच्या आंगार कुत्र्याक सोडपाचो प्रकार जालो. त्या कुत्र्याक ताच्या पायांक घास मारलो अशें तांणी सांगलें. घडणुके उपरांत पुलिसांक खबर दितगीर तांणी मध्यान रातीं प्रदीश पार्सेकाराक ताब्यांत घेवून उपरांत सोडलें. मंगळाराक नागवे वाठारांतल्या हरिजन लोकांनी वाळपय पुलीस स्टेशनाचेर मोर्चा व्हरून मारपेट केल्ल्यांक अटक करपाची मागणी केली.
नागवेंतल्या ह्या रेस्टॉरन्टांत रातयां उसरां मेरेन गैरवेव्हार चलतात असो आरोप गोवा डेमोक्रेटिक फ्रन्टाचो अध्यक्ष आनी थळावो नागरीक सुभाष केरकार आनी हेरांनी केला. थंय घुंवळी वखदांचो वेव्हार चलता असो तांचो दावो आसा. रातयां थय आलिशान गाडयो येतात मात थळावी यंत्रणा ताचे कडेन आडनदर करता अशें तांचें म्हणणे आसा. वाळपय पुलिसांनी दिल्ले म्हायती प्रमाण अनमोल खांडेपारकाराचो बापूय मेनन खांडेपारकार हाणे मारपेटाची कागाळ केल्या. ताची दखल घेवन प्रदीप पार्सेकार, बिरो काळे आनी राजेश सावंत हांकां अटक केल्या. अनमोलाक दुखापत जाल्ल्यान ताका वाळपयच्या सरकारी सामाजीक हॉस्पिटलांत दाखल केलां. थळावो पंच सोमनाथ काळे हाचे कडेन संपर्क सादलो तेन्ना थळाव्या लोकांक नाका जाल्यार रेस्टॉरन्टाचो परवानो रद्द करपाक आपली हरकत आसची ना अशें ताणे सांगलें. रेस्टॉरन्टाक लागून गांवांतलें वातावरण इबाडटा जाल्यार परवानो रद्द केल्यार जाता अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
