भांगरभूंय | प्रतिनिधी
दिल्लीचे मुख्यमंत्री अरविंद केजरीवाल हांणी मुख्यमंत्री निवासाच्या नूतनीकरणा खातीर सरकारी तिजोरेंतल्यान खर्च केल्ल्या सुमार 45 कोटी रुपयांचो विशय साबार लोकां खातीर सद्या चर्चेचो थारला. तातूंत दिल्लींतूच राजकी आखाड्यांत रंगिल्ल्या आंतरराष्ट्रीय नामनेच्या बायल कुस्तीवाल्यांचे कुस्तीनूय देशाचें लक्ष ओडून घेतलां. मुख्यमंत्री केजरीवाल हांकां देशांतलो सगल्यांत गिरेस्त ‘आम आदमी ‘चो बंगलो कसो आसचो, हें घडये दाखोवन दिवपाचें आसतलें. जाल्यार तांच्याच दिल्लींत बायल कुस्तीवाल्यांक तांचेर जाल्ल्या अन्यायाक वाचा फोडपा खातीर सुरू केल्ल्या आंदोलनाक वेगळेंच मोडण मेळत गेलां आनी ते वेगळेच कडेन फरफटत चल्लां, अशें म्हणपाक जाता. आपल्या बंगल्याच्या नुतनीकरणाच्या कामांत गुल्ल आसतनाय तातूंतल्यान वेळ काडत केजरीवाल हांणी बायल कुस्तीवाल्यांक मेळून तांचे कडेन चर्चा केली, हें कमी म्हणपाक मेळचें ना. मात, आंदोलनाचें रुपांतर राजकी आखाड्यांत जाल्ल्यान कुस्तीवाल्यांचेर न्याया खातीर आतां चड संघर्श करपाचो वेळ आयला.
भारतीय कुस्ती म्हासंघाचे बऱ्याच तेंपा सावनचे सर्वेसर्वा ब्रीजभूषण शरणसिंह हांचे कडल्यान बायल कुस्तीवाल्यांचें जाल्लें कथीत लिंगीक शोशण हें प्रकरण आसा आनी ताका बंदखणीत धाडले बगर आंदोलन फाटीं घेवपाचें ना असो कुस्तीवाल्यांचो निर्धार आसा. ब्रीजभूषण शरणसिंह हाचो इतिहास तपासून पळयल्यार ताचे आड साठेक गुन्यावांची नोंद जाल्ली दिसता. ताका लागून उत्तर प्रदेशांतल्या अतिक अहमद हाचे पिलावळींतलो तो एक आसपाक शकता असो दुबाव घेवपाक बरोच वाव आसलो तरी सध्या तो भाजपाचो खासदार आसा, हीच ताची सगल्यांत जमेची बाजू आसा.
भारतीय कुस्तीगिरांनी देश- विदेशांत कुस्ती हे भारतीय परंपरेंतल्या खेळाक खूब मान मेळोवन दिला ही खरी गजाल, तरी हेच कुस्तीगीर दिल्लींत जंतर मंतर सारके सुवातेर फाटल्या आठ- धा दिसां सावन धरणे धरून बसल्यात, ताका कितें म्हणपाचें. आतां बायल कुस्तीगिरांचेर जाल्ल्या लिंगीक शोशणा वयल्यान हें धरणे आंदोलन चालू आसा तरी वेळार चवकशी तपास हें सगळें कितें जाल्लें आशिल्लें जाल्यार तांचेर अशे तरेन रस्त्यार येवपाची पाळी येनाशिल्ली हेंय तितलेंच सत. हाका जापसालदार कोण जाल्यार ती आमची वेवस्था आनी घाळ यंत्रणा हातूंत दुबाव ना. अशे तरेच्या आंदोलनाक लागून ह्या मळार फुडें येवन करियर घडोवपाची सपनां पळोवपी तरणाटे पिळगे सामकार आमी खंयचे आदर्श दवरतले हो खरो प्रस्न आसा.
कुस्ती बदनाम जायत चल्ल्या आनी ताचे पसून कुस्ती वाटावप सध्याच्या वेळार सगल्यांत म्हत्वाचें आशिल्ल्यान हो वाद बेगीन काबार करप ही काळाची गरज. ते खातीर अर्थातूच ल्हान- व्हड कोण हाचो कसलोच विचार करनास्तना जे दोशी आसात तांचे आड खर कारवाय करचीच पडटली. ब्रीजभूषण शरणसिंह हें प्रस्थ तशें सहज फाटीं सरचें ना हें आतां मेरेन जाल्ल्या घडणुकां वयल्यान स्पश्ट जालां. दोनूय बाजू हट्टाक पेटल्यार हो संघर्श चड खर जावपाक शकतलो आनी तातूंतल्यान चड लुकसाण जातलें तें कुस्तीचें, हाचोय विचार जावपाक जाय.
बायल कुस्ती खेळगड्यांनी रस्त्यार ही लडाय लडपाचो घेतिल्लो निर्णय हो बरोच विचारा करून घेतलो आसुये, अशें दिसता. एके रातींत अशे निर्णय जायनात. ब्रीजभूषण शरणसिंह हाचे आड जे आरोप केले वतात ते तशे नवे न्हय. मात एकाद्र्या पांवड्यार ह्या गंभीर आरोपांची दखल घेतिल्ली जाल्यार आयज हो वेळ येनाशिल्लो हेंय तितलेंच सत. सर्वोच्च न्यायालयांत हें प्रकरण गेले उपरांत, आतां तपासाची चक्रां फिरपाक लागल्यांत. दिल्ली पुलिसांनीय भाजपाचो बाहुबली खासदार आनी अ. भा. कुस्ती म्हासंघाचो अध्यक्ष ब्रीजभूषण शरणसिंहा आड एफआयआर नोंद केला. मात ताणें आंदोलकांचें समाधान जालां, अशें दिसना. उरफाटें बायल कुस्तीगीरांचो आतां दिल्ली पुलिसांचेर लेगीत विस्वास उरूंक ना. अश्या वेळार तांची एकूच मागणी आसा की शरणसिंहाक अटक जावची आनी खासदार म्हणून लेगीत तांकां काडून उडोवचें.
ह्या महाशया आड जे आरोप आसात ते जाल्यार सामके गंभीर तरेचे आसात. हेर कोणाचेर अशे आरोप जाल्ले जाल्यार आतां मेरेन तो बंदखणींत पावताशिल्लो. पूण हांगा तशें जाल्लें दिसना. ब्रीजभूषणाचेर कोणाचो वरदहस्त आहें हें हांगा सांगपाची गरज ना. हाचें फाटलें कारण म्हणल्यार एकान एक विरोधी फुडारी जंतरमंतराक पावल्यात. मात, कुस्तीवाल्यांनी आतां मात्सो संयम पाळून ह्या प्रकरणाची चवकशी वा तपासा खातीर थोडो वेळ दिवपाची गरज आसा. सर्वोच्च न्यायालयांत हें प्रकरण पाविल्ल्यान मात्सो संयम बाळगून आंदोलन फाटीं घेतिल्लें जाल्यार तें योग्य थारताशिल्लें.
बायल कुस्तीगीरांचेर अन्याय जाल्ल्याचें तांचे आक्रमतेंतल्यान कांय प्रमाणात स्पश्ट जालां तरीय दोनूय बाजूचें म्हणणे आयकून ताचे वयल्यान निर्णय घेवचो, अशें त्रयस्थांक दिसता तें चूक म्हणपाक जावचें ना. केंद्रीय खेळां मंत्रालयाक लेगीत ह्या प्रकरणांत म्हत्त्वाची आनी निर्णायक भूमिका घेवन हो संघर्श टोका कडेन पावचो ना हाचे कडेन लक्ष दिवचें पडटलें. बायल कुस्तीगीरांचें समाधान जातलें असो तोडगो काडटना वेळ पडल्यार कठोर जावचें पडटलें. विरोधी राजकी पक्षांच्या फुडाऱ्यांनी ह्या प्रकरणाचो अप्रत्यक्ष कांय जायना फायदो घेवपाचो केल्लो यत्न फाटल्या दोन- तीन दिसांत केल्ल्याचें दिसून आयलां. खेळगड्यांनी निमाणे अशा राजकी फुडाऱ्यांक आपल्या लागीं येवपा पसून आडायल्लें जाल्यार तें चड संयुक्तीक थारपाचें. मात प्रत्यक्षांत वेगळेंच चित्र दिसलें आनी आंदोलनान तयार जाल्ली सहानुभूतीचें ल्हार देंवलें.
ब्रीजभूषण शरणसिंह हाचे विशीं आतां केंद्र सरकाराक एक म्हणल्यार खर निर्णय घेवचोच पडटलो. ना जाल्यार कोणूय आयज निश्चीत भावनेन कुस्तीच्या आखाड्यांत देंवपाक तयार जावचो ना आनी अशे दुशीत वातावरणात आपल्या भुरग्यांक धाडपा पयलीं पालक हजार फावट विचार करतले. हेर मैदानी खेळांचे बाबतींत पालकांनी होच विचार केल्यार निमाणे लुकसाण जातलें तें खेळाचें हाचें भान दवरपाची गरज आसा. आंदोलन करतल्यांनी कांय अवास्तव मागण्यो केल्यात. तांचो विचार केल्यार तांचें समर्थन कोणूच करचो ना. आपल्याचेर जाल्ल्या अन्याया आड लडटना अती रंजीत मागण्यो फुडें हाडप हेय राजकी तेंको मेळोवपा इतलेंच हांशें जावपाचें अशें म्हणपाक जाता. खेळाच्या मळार राजकारणाक थारो नाका हाची जाणीव खेळगड्यांक
आसपाक जाय.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
